Mu basifuzi 68 batoranyijwe bazasifura imikino y’Igikombe cy’Isi cy’Abangavu batarengeje imyaka 20 izabera muri Pologne, harimo Umunyarwandakazi, Salima Mukansanga uri mu bazaba bari mu bakoresha amashusho yunganira abasifuzi [VAR].
Ku wa 24 Kamena 2026, ni bwo Ishyirahamwe ry’Umupira w’Amaguru ku Isi [FIFA], ryatangaje urutonde rw’abasifuzi 68 bazasifura Igikombe cy’Isi cy’Abangavu batarengeje imyaka 20 kizabera muri Pologne tariki ya 5-27 Nyakanga 2026.
Salima Mukansanga wahagaritse gusifura hagati ahubwo akajya mu basifuzi bakoresha amashusho yunganira abasifuzi [VAR], ari mu bagore 10 mu basifuzi 14 bazaba bakoresha iri koranabuhanga mu mikino 52 y’iri rushanwa rizaba ryitabiriwe n’Ibihugu 24.
Abasifuzi bo hagati batoranyijwe, ni 18 mu gihe abo ku ruhande bose uko ari 36, ari abagore.
Mukansanga yaherukaga gusifura irushanwa rinini kuva yaba umusifuzi wo kuri VAR, ubwo yasifuraga Igikombe cya Afurika cy’Abagore cyabaye mu 2025.
Ari mu bagore batatu bahawe gusifura mu mikino y’Igikombe cy’Isi cya 2022 cyabereye muri Qatar, aba umugore wa mbere ubikoze aturuka muri Afurika.
Kuva yaba umusifuzi mpuzamahanga wemewe na FIFA mu 2012, Salima yahise aba umugore wa mbere wasifuye Igikombe cya Afurika.
Mbere yo gusezera gusifura, Salima yanasifuye mu Mikino Olempike, Igikombe cy’Isi cy’Abagore, Igikombe cya Afurika cy’Abagore, CAF Women’s Champions League.
Yagiye yegukana ibihembo bikomeye birimo BBC 100 Women [urutonde rw’Abagore 100 bakomeye muri Afurika], Forbes Woman Africa, Forty under 40 Africa Award, East Africa Youth Award n’ibindi.
UMUSEKE.RW
