Umutwe wa MRDP-Twirwaneho ugenzura ibice binini bya Minembwe muri Kivu y’Amajyepfo washinje Ingabo za Repubulika Iharanira Demokarasi ya Congo kurasa indege ya gisiviri yari izanye imiti n’ibiribwa muri ibyo bice.
Ni mu butumwa Col.Rugaba Fidele uvugira MRDP-Twiraneho yanditse ku rubuga rwa X kuri uyu wa Kane tariki ya 27 Kanama 2026.
Yanditse avuga ko Leta ya Kinshasa ikomeje gushotorana nyuma yaho urwego mpuzamahanga ruhuriweho rushinzwe kugenzura iyubahirizwa ry’agahenge (EJVM+) ruviriye mu Minembwe, ibitero byariyongeye.
Ati “Uyu munsi ku wa 27 Kanama 2026. Indege yaba gisiviri yarijanye imiti mu Minembwe ikaba irasiwe [i] Bikuba na missile ivuye ku butaka.”
Amakuru avuga ko iyo indege yarashwe yavaga mu muri Bukavu.
Kuva mu gitondo muri Minebwe no mu bice bihakikije hari haramukiye imirwano.
Umuvugizi w’Ingabo za AFC/M23, Lawrence Kanyuka, yari yaramutse yandika ko Ingabo za Congo, iz’u Burundi, Wazalendo, FDLR n’abacanshuro b’abanyamahanga, baramutse bagaba ibitero ahantu hatandukanye.
Kanyuka yavuze hifashishijwe drones n’imbunda ziremereye, Ingabo za Congo zagabye ibitero mu bice bya Point Zéro, Nyaruhinga, na Mukoko i Minembwe.
Aha havugwa imirwano hari haciye iminsi mike Itsinda rihuriweho n’abahagarariye Guverinoma ya Repubulika Iharanira Demokarasi ya Congo, ihuriro AFC/M23 ndetse n’ibihugu bigize umuryango w’Akarere k’Ibiyaga Bigari (EJVMV+/MCVE+) rihasuye ku wa 24 Kanama mu rwego rwo kugenzura iyubahirizwa ry’agahenge.
MUGIRANEZA THIERRY/ UMUSEKE.RW
