Umutoza w’Umunya-Denmark, Kasper Hjulmand, uri mu Rwanda nka Ambasaderi w’Ishami ry’Umuryango w’Abibumbye ryita ku Bana (UNICEF), yasuye Irerero rya ‘Iron Sports Academy Rwanda’ rikorera ku Ruyenzi mu Karere ka Kamonyi.
Hjulmand, watoje amakipe arimo Mainz 05, ikipe y’igihugu ya Denmark ndetse na Bayer Leverkusen, yagiranye ibiganiro n’abana bato n’abatoza b’iryo rerero ku iterambere ryabo ndetse n’uburyo abakinnyi bato bategurwa kugira ngo bagere ku rwego rwo hejuru.
Uyu mutoza yasuye aba bana ku wa Kane, tariki ya 27 Kanama 2026, areba uko bitoza ndetse abasaba guhora bafite intego mu byo bakora byose.
Mu biganiro yagiranye n’abana bo muri iri rerero, yabibukije ko badakwiye gutandukanya gukina n’ishuri.
Yabibukije ko umupira n’amashuri bidakwiye gufatwa nk’ibihanganye ahubwo ko ari ibintu bibiri bigendana ndetse bikaba byagira uruhare mu gutegura ejo heza.
Abarimo Uwimana Olivier washinze iri rerero, abatoza n’abandi bareberera aba bana umunsi ku wundi, basabwe na Kasper gukomeza gufasha aba bana gukuza impano zabo.
Hjulmand ni izina rinini muri ruhago y’i Burayi. Yatoje Denmark mu mikino ya UEFA Euro 2020 ndetse ayigeza muri 1/2.
Nk’umutoza, yafashije Igihugu cye kubona itike yo gukina Igikombe cy’Isi 2022 cyabereye muri Qatar ndetse guhera itike yo gukina Euro 2024.
Kuva muri Nzeri 2025, yagizwe umutoza wa Bayern Leverkusen ikina Shampiyona y’Icyiciro cya Mbere mu Budage (Bundesliga).
UMUSEKE.RW
