U Rwanda na Oman byasinye amasezerano umunani mashya mu nzego zitandukanye agamije kwagura ko gukomeza umubano ndetse no gusangira inyungu.
Aya masezerano yasinywe mu gitondo cyo ku wa Kabiri tariki ya 8 Nzeri 2026 mu Ngoro ya Al Hosn i Salalah.
Amasezerano yasinywe harimo abiri arimo amasezerano yo gukuraho Visa ku bafite pasiporo z’Abadipolomate, iza Serivisi na Pasiporo zidasanzwe ndetse n’amasezerano yo gukuraho gusoresha kabiri ku bicuruzwa na serivisi hagati y’u Rwanda na Oman.
Hasinywe kandi amasezerano atandatu y’ubwumvikane arimo amasezerano yo gukorana mu buhinzi n’ubworozi, ubwikorezo, imikoranire ku byambu byo ku butaka, uruhererekane rwa serivisi, guteza imbere ishoramari, abakozi no gushyira mu bikorwa ishoramari.
Ku ruhande rwa Oman amasezerano yasinywe na Sayyid Badr bin Hamad Al Busaidi, Minisitiri w’Ububanyi n’Amahanga; Sultan bin Salim Al Habsi, Minisitiri w’Imari; Anwar bin Hilal Al Jabri, Minisitiri w’Ubucuruzi, Inganda no Guteza Imbere Ishoramari na Ali bin Talib Al Maawali, Umuyobozi ushinzwe ibikorwa by’ubucuruzi muri Oman Aviation Investment.
Ku ruhande rw’u Rwanda, amasezerano yasinywe na Olivier Nduhungirehe, Minisitiri w’Ububanyi n’Amahanga n’Ubutwererane; Yusuf Murangwa, Minisitiri w’Imari n’Igenamigambi; Antoine Kajangwe, Minisitiri w’Ubucuruzi n’Inganda; Solange Uwituze, Umunyambanga wa Leta muri Minisiteri y’Ubuhinzi n’Ubworozi; na Juliana Muganza, Umuyobozi Wungurije w’Urwego rw’Igihugu rw’Iterambere (RDB).
Kuva ku wa Mbere Perezida Paul Kagame n’itsinda ry’abayobozi b’u Rwanda barikumwe ari mu ruzinduko rw’akazi rw’iminsi ibiri aho yakiriwe ndetse akagirana ibiganiro na Sultan Haitham bin Tariq wa Oman, bigamije gushimangira umubano.
Ku munsi wa kabiri Perezida Kagame arasura Inzu Ndangamurage ya Frankincense Land, iherereye muri Al Baleed Archaeological Park, ahantu hashyizwe ku rutonde rw’Umurage w’Isi rwa UNESCO.
Umukuru w’Igihugu kandi arasura icyanya cya Razat Royal Farm kiri ku buso bwa hegitari 1000, aha hagakorerwa ubuhinzi bwa kijyambere.
MUGIRANEZA THIERRY/ UMUSEKE.RW
