Kayonza: Umugabo yaguye mu bwiherero bwa metero 10 agiye gukuramo telefoni y’uwitwa Nsengiyumva Anicet, ahita apfa.
Iyi mpanuka yabereye mu Mudugudu wa Mburabuturo, Akagari ka Mburabuturo, Umurenge wa Mukarange.
Umunyamabanga Nshingwabikorwa w’Umurenge wa Mukarange ahabereye impanuka, Murekezi Claude yabwiye UMUSEKE ko byabaye ku gicamunsi cyo ku wa Gatandatu taliki ya/10/10/2026.
Gitifu Murekezi avuga ko Nzayisenga Samuel yamenye ko telefoni y’uwitwa Nsengiyumva Anicet yahanukiye mu bwiherero ajya kuyikuramo, ahera umwuka ahita apfa.
Ati: “Ubuyobozi bwahageze ku bufatanye na Polisi, umurambo wahise ukurwa mu mwobo w’ubwiherero ujyanwa mu Bitaro bya Gahini gukorerwa isuzuma.”
Gitifu w’Umurenge akomeza avuga ko Inzego z’Ubugenzacyaha zatangiye gukora iperereza ryimbitse kugira ngo harebwe niba haba hari uruhare Nsengiyumva Anicet yaba yagize mu kohereza nyakwigendera mu bwiherero, gukuramo telefoni.
Gitifu Murekezi avuga ko uyu Nsengiyumva Anicet ari mu maboko ya RIB akaba akurikiranyweho icyo cyaha akekwaho.
Iperereza ku cyateje uru rupfu rirakomeje.
MUHIZI ELISÉE
UMUSEKE.RW/Kayonza
