Urubyiruko rw’Aba ‘Sober Ghee na Chou’, ruhuriye mu kiragano cy’urubyiruko ruzira inzoga n’ibiyobyabwenge, rwifatanyije n’abayobozi batandukanye mu nzego nkuru z’Igihugu n’abaturage mu Muganda Wihariye w’Urubyiruko w’Igihembwe cya Mbere (2026-2027).
Uyu Muganda wabaye kuri uyu wa Gatandatu, tariki ya 19 Nzeri 2026, hirya no hino mu Gihugu, ku nsanganyamatsiko igira iti: “Irinde Ibiyobyabwenge – Wiheshe Agaciro”.
Mu bikorwa byakozwe harimo gusana amazu y’abaturage batishoboye, gusana ibisenge, gukurungira amazu no kuyatera igishahuro, gusana ubwihorero, gukora imirwanyasuri no gukora imihanda y’imigenderano.
Ibi bikorwa byaherekejwe n’ubutumwa busaba urubyiruko kwirinda inzoga n’ibiyobyabwenge.
Mu Karere ka Ruhango, Minisitiri w’Urubyiruko n’Iterambere ry’Ubuhanzi, Dr. Utumatwishima Jean Nepo Abdallah, yifatanyije n’abayobozi b’Intara y’Amajyepfo na Karere ndetse n’urubyiruko rwo muri ako Karere mu gusibura imihanda y’imigenderano.
Mu Karere ka Karongi, urubyiruko rwifatanyije na Minisitiri w’Ubuzima, Dr. Sabin Nsanzimana, Umunyamabanga Uhoraho muri Minisiteri y’Uburinganire n’Iterambere ry’Umuryango (MIGEPROF), Mireille Batamuliza, ndetse n’Umuyobozi Mukuru wa Polisi y’u Rwanda, CG Felix Namuhoranye.
Mu Muganda wabereye i Rubengera mu Kagari ka Gacaca, Minisitiri Dr. Sabin Nsanzimana na IGP Namuhoranye basabye urubyiruko kwirinda ibiyobyabwenge n’ubusinzi, bakagira ubuzima bwiza, bakihesha agaciro kandi bagakoresha imbaraga bafite bubaka ahazaza heza.
Mu Karere ka Burera, mu Ntara y’Amajyaruguru, urubyiruko rwifatanyije n’Umunyamabanga wa Leta muri Minisiteri ya Siporo, Ngarambe Rwego, wari kumwe n’urundi rubyiruko ruzwi ku mbuga nkoranyambaga.
Mu Mujyi wa Kigali, Umunyamabanga Uhoraho muri Minisiteri y’Ubucuruzi n’Inganda, Tuyishimire Chantal, n’abandi bayobozi batandukanye bifatanyije n’urubyiruko mu Muganda wabereye mu Murenge wa Kimisagara, mu Karere ka Nyarugenge.
Muri uyu Muganda, hasibuwe imirwanyasuri ifata amazi y’imvura mu rwego rwo gukumira ibiza bishobora guterwa n’imvura nyinshi y’umuhindo.
Mu Ntara y’Iburasirazuba, Umunyamabanga Uhoraho muri Minisiteri y’Urubyiruko n’Iterambere ry’Ubuhanzi, Parfait Ishungure, ari kumwe na Guverineri w’iyi Ntara, Pudence Rubingisa, bifatanyije n’urubyiruko rwo mu Karere ka Ngoma.
Muri iki gikorwa, urubyiruko rwakoze isuku mu nkengero z’Umujyi w’Akarere ka Ngoma.
MUGIRANEZA THIERRY/ UMUSEKE.RW
