Minisiteri y’Ubuzima muri Repubulika Iharanira Demokarasi ya Congo yatangaje ko kugeza ku wa 31 Kanama 2026, abantu 6,186 bari bamaze kemezwa ko barwaye icyorezo cya Ebola cyo mu bwoko bwa Bundibugyo, muri bo 3,007 kirabahitana.
Iyi Minisiteri ivuga ko Ebola yageze mu Ntara esheshatu z’Igihugu ari zo Bas-Uélé Ituri, Kivu y’Amajyaruguru, Kivu y’Amajyepfo, Haut-Uélé na Tshopo mu duce 60 tw’ubuzima.
Intara ya Ituri yabaye izingiro ry’icyorezo na 90% by’abanduye.
Kuva hagati muri Gicurasi 2026, mu bantu 6,186 bamaze kwandura Ebola, 3,007 barapfuye, mu gihe abandi 830 bakiri mu kato cyangwa barimo kuvurirwa mu bitaro. Ibi bivuze ko hafi 47% by’abanduye bose bamaze guhitanwa na yo.
Tariki ya 21 Kanama 2026, i Kinshasa hakiriwe icyiciro cya mbere cyari kigizwe n’inkingo 16,520 mu nkingo 50,120 iki Gihugu kizakira ngo gihangane na Ebola.
Ebola yo mu bwoko bwa Bundibugyo ikomeje kuzahaza Repubulika Iharanira Demokarasi ya Congo kuva muri Gicurasi 2026, nta rukingo cyangwa umuti ifite.
Ishami ry’Umuryango w’Abibumbye ryita ku Buzima (OMS) ryatangaje ko izi nkingo zo mu bwoko bwa Ervebo zakwifashishwa mu guhangana n’iyi Ebola hashingiwe ko zari zarigeze kwifashishwa mu guhangana na Ebola yo mu bwoko bwa Zaire yishe abarenga 11,000 mu Burengerazuba bwa Afurika hagati ya 2013 na 2016.
MUGIRANEZA THIERRY/ UMUSEKE.RW
