Mu gihe habura iminsi ibiri ngo u Rwanda rwakire CAF Women’s Champions League CECAFA Qualifiers 2026, UMUSEKE wegeraranyije amwe mu makuru yo kumenya ku makipe 10 azayikina hashakwa itike imwe yo kuzakina imikino Nyafurika.
Uko irushanwa rizakinwa!
Ni amakipe 10 yashyizwe mu matsinda atatu. Itsinda rya mbere ririmo amakipe ane mu gihe irya Kabiri n’irya gatatu hashyizwemo amakipe atatu.
Mu itsinda A hazazamuka amakipe abiri mu gihe muri buri tsinda hazazamukamo imwe, abe ane azahita ahurira muri ½ yishakemo ebyiri zizagera ku mukino wa nyuma.
Ibyo kumenya ku itsinda A.
Ririmo Rayon Sports WFC ihagarariye u Rwanda, Jei Joint Stars FC yo muri Sudani y’Epfo, Mafunzo ya Zanzibar na Denden FC yo muri Eritréa.
Rayon Sports WFC.
Yashinzwe mu 2022, ihita itangira gukina muri Shampiyona y’Icyiciro cya Kabiri ya 2022-23 ndetse yegukana igikombe ihita izamuka mu cyiciro cya mbere kuva ubwo.
Imaze kwegukana ibikombe bitatu bya Shampiyona [2023-24, 2024-25 na 2025-26]. Imaze kwibikaho ibikombe by’Amahoro bibiri harimo icya 2023-24 n’icya 2025-26.
Ni inshuro ya gatatu igiye gukina aya marushanwa. Mu mwaka ushize ubwo yitabiraga CAF Women’s Champions League CECAFA Qualifiers yabereye muri Kenya, yatsindiwe ku mukino wa nyuma igitego 1-0 na JKT Queens yo muri Tanzania. Itozwa na Rwaka Claude ufite Licence B-CAF ariko uri kwigira A-CAF.
Yei Joint Stars FC.
Yashinzwe mu 2019. Imaze kwegukana ibikombe bibiri bya Shampiyona [2021 na 2022]. Ni inshuro ya gatatu igiye kwitabira aya marushanwa Nyafurika. Umutoza wayo ni Esther Paul Khamis ufite Licence A-CAF. Inshuro zose yitabiriye iri rushanwa, yasezerewe itarenze amajonjora.
Mafunzo WFC.
Ni ikipe ishamikiye ku ya basaza babo yitwa Mafunzo FC ikina Shampiyona y’iwabo muri Zanzibar. Yaje mu Rwanda yaregukanye igikombe cya Shampiyona y’umwaka ushize w’imikino 2025-26.
Ni ikipe ifite amikoro ahagije ariko ntabwo iragira ibigwi binini mu mupira w’amaguru. Ifite abakinnyi benshi b’abanyamahanga baje kuyifasha kubaka ibigwi.
Denden FC.
Ni ikipe yashinzwe na Minisiteri y’Ingabo muri Eritréa. Ibarizwa mu Mujyiw a Asmara muri iki gihugu.
Yegukanye ibikombe bibiri bya Shampiyona [2024 na 2025]. Itozwa na Rezene Gerbregiorgis Demoz ufite Licence A-CAF. Ni ikipe nayo idafite ibigwi bikomeye muri ruhago y’abagore mu Karere ka Afurika y’i Burasirazuba no Hagati.
Ibyo kumenya ku itsinda B.
Ririmo Commercial Bank Ethiopia FC yo muri Ethiopia, Kawembe Muslim Ladies yo muri Uganda na FC Ujeco yo muri Djibouti.
Commercial Bank of Ethiopia FC [CBE].
Ni ikipe ifite izina rinini muri Shampiyona y’iwabo ndetse no mu Karere ka Afurika y’i Burasirazuba no Hagati. Ibitse ibikombe umunani bya Shampiyona imaze kweguka na kimwe cya CECAFA yegukanye mu 2024.
Imaze kandi kwegukana ibikombe by’igihugu bibiri na kimwe cya Super Coupe.
Kawembe Muslim Ladies.
Ni ikipe yashinzwe mu 2015, ishingirwa mu Mujyi wa Kampala muri Uganda. Ni ikipe ibitse igikombe cya Shampiyona y’umwaka ushize 2025-26. Ni yo iyoboye ruhago y’abagore muri iki gihugu.
Imaze kwegukana ibikombe bitandatu bya Shampiyona [2015, 2016, 2017, 2018, 2024 na 2026]. Muri 2024 yabaye iya Kabiri muri CECAFA.
FC Ujeco.
Ni ikipe yo muri Djiouti, iyoboye umupira w’amaguru w’abagore waho. Niyo yegukanye igikombe cya Shampiyona 2025-26. Mu rwego rwo kwiyubaka, yaguze abanyamahanga batandukanye barimo n’Abanyarwandakazi batanu ndetse n’abandi bakomoka muri Ethiopia.
Ibyo kumenya ku itsinda C.
Ririmo Simba Queens yo muri Tanzania, Kenya Police FC yo muri Kenya na Top Girls Academy yo mu gihugu cy’u Burundi.
Simba Queens.
Ni ikipe ishamikiye kuri Simba SC ifite ibigwi muri Tanzania. Iri muri ebyiri zikomeye muri ruhago y’abagore muri iki gihugu. Niyo ibitse igikombe cya Shampiyona 2025-26.
Ibitse ibikombe bitanu bya Shampiyona y’iwabo. Yegukanye igikombe cya CECAFA ya 2022. Izaba iri mu makipe ahabwa amahirwe yo kwegukana iri rushanwa.
Kenya Police FC.
Ni ikipe ifite izina rinini muri ruhago y’abagore muri Kenya. Yegukanye igikombe cya Shampiyona 2025-26 ku nshuro ya gatatu yikurikiranya [2023-24 na 2024-25]. Ni imwe mu zikomeye mu irushanwa ry’uyu mwaka rizabera i Kigali.
Top Girls Academy.
Ibitse igikombe cya Shampiyona y’iwabo i Burundi ya 2025-26. Niyo iyoboye ruhago yo muri iki gihugu, ndetse niyo itanga abakinnyi benshi mu ikipe y’Igihugu y’abagore.
Ibarizwa mu Mujyi wa Ngozi. Yashinzwe mu 2006. Iri mu makipe afite izina mu Karere ka Afurika y’i Burasirazuba no Hagati.
Ikipe yegukanye igikombe cya CAF Women’s Champions League CECAFA Qualifiers, ihita ikatisha itike yo gukina CAF Women’s Champions League ndetse igahabwa ibihumbi 100$. Irushanwa rizakinwa tariki ya 21-31 Kanama 2026.
UMUSEKE.RW
