Mu mukino wa gicuti wabaye kuri Yanga Day ‘Siku ya Wananchi 2026’, ikipe ya Les Aigles du Congo yo muri RDC, yatsinze Yanga SC ibitego 2-1.
Uyu mukino wabaye ku Cyumweru, tariki ya 9 Kanama 2026 kuri Uhuru Stadium muri Tanzania.
Yanga SC yari yabanje gukora umuhango wo kwereka abafana, abakinnyi izifashisha mu mwaka w’imikino 2026-27, yatangiye neza uyu mukino inabona igitego hakiri kare.
Ku munota wa 26 w’umukino, iyi kipe ikunzwe na benshi muri Tanzania, yari ibonye igitego cyatsinzwe na Peter Shalulile kuri penaliti yari akorewe.
Gusa abanye-Congo ntabwo bacitse intege kuko basunitse kugeza babonye igitego cyo kwishyura ku munota wa 36 cyatsinzwe na Tonny Talasi maze igice cya mbere kirangira amakipe yombi anganya igitego 1-1.
Les Aigles du Congo izakina na APR FC mu mukino w’ijonjora ry’ibanze rya CAF Champions League, yaje kubona igitego cya Kabiri ku munota wa 66 nacyo cyatsinzwe na Talasi.
Yanga SC yakinishije amakipe abiri, yakomeje gusunika ishaka uko yakwishyurwa igitego yari yatsinzwe, ariko iminota 90 irangira abanye-Congo batsinze ibitego 2-1.
Les Aigles du Congo yo muri RDC, yabaye iya Kabiri muri Shampiyona y’umwaka ushize 2025-26 iwabo.
UMUSEKE.RW
