Ubuyobozi bwa Rutsiro FC, bwirukanye Niyonkuru Gustave wari umutoza mukuru wayo, bugarura Omar Rubangura wigeze kuyibera umutoza mukuru w’agateganyo akanayibera uwungirije.
Ni amakuru yamenyekanye ku wa kane, tariki ya 7 Gicurasi 2026 n’ubwo ubuyobozi bw’iyi kipe butaragira icyo buyavugaho.
Amakuru yizewe UMUSEKE wamenye, ahamya ko Niyonkuru Gustave yamaze kwirukanwa ndetse n’abatoza bari bamwungirije barimo uwatozaga abanyezamu, Ndongozi Faradji n’uwongereraga imbaraga abakinnyi [fitness coach], Ingabire Jean Paul.
Rubangura azatoza imikino yose isigaye ya Shampiyona, nirangira impande zombi zizaganire ibindi bitewe n’uko umwaka w’imikino uzaba urangiye.
Omar ubwo yinjiraga muri Rutsiro FC, yari yungirije Gatera Moussa ubwo iyi kipe yari mu cyiciro cya kabiri, barayizamura ndetse bakomezanya n’umwaka wakurikiyeho ariko Gatera aza gutandukana n’iyi kipe ubwo umwaka w’imikino 2024-25 wari urangiye.
Uyu mutoza yakomezanyije ikipe kugeza bazanye Bizumuremyi Radjabu bakoranye ariko nawe akaza gusezererwa.
Ubwo Bizumuremyi yari asezerewe, Rubangura yagumanye ikipe by’agatenyo ndetse atsinda imikino ikomeye irimo uwo yatsindiye Al-Hilal SC i Kigali ibitego 2-1 n’uwo yatsindiye Amagaju FC kuri Stade Kamena.
Ayisanze ku mwanya wa nyuma n’amanota 26 mu mikino 30 imaze gukinwa. Irarushwa rimwe na AS Muhanga ya 17 na Etincelles FC iri ku mwanya wa 16 ikarushwa abiri n’Amagaju FC iri ku mwanya wa 15.
UMUSEKE.RW
