*Nyiri uruganda ngo yari yarafashe inguzanyo ya miliyoni 100Frw yo kubaka uruganda, arahombye
Inzego z’Ubuyobozi mu Karere ka Muhanga zafunze Uruganda rwenga “inzoga zitujuje ubuziranenge”, hamenwa na litiro zirenga 13,000.
Mu gitondo cyo kuri uyu wa Gatatu taliki ya 05/08/2026 inzego z’ubuyobozi zitandukanye zabyukiye mu mukwabu wo kumena inzoga zitujuje ubuziranenge, zinafunga uruganda ruzenga.
Umuyobozi w’Akarere ka Muhanga, Kayitare Jacqueline avuga ko uyu munsi ari uwa kane bakora ubugenzuzi bw’abacuruza inzoga zitujuje ubuziranenge.
Meya Kayitare avuga ko bari basanganywe inganda eshatu zenga ubwoko bw’izi nzoga, gusa ebyeri muri zo zikaba zarafunzwe, hakaba hari hasigaye rumwe rwafunzwe uyu munsi.
Ati: “Ubugenzuzi bwakozwe bwasanze uru ruganda rutunganya inzoga zitujuje ubuziranenge, bikaba bihabanye n’uruhushya bari barahawe kuva mbere na FDA.”
Kayitare yabwiye itangazamukuru ko inzoga zitujuje ubuziranenge basanze mu rwengero zimenwa, ndetse bagafunga n’uruganda rwazitunganyaga.
Yongeyeho ati: “Twasanze inzoga zitujuje ubuziranenge uruganda rwenga abazihaga abaturage ntabwo bitaga ku ngaruka zifite.”
Uyu Muyobozi yavuze kandi ko usibye gufunga uruganda no kumena inzoga zitujuje ubuziranenge, bakuramo ibikoresho bifashishaga benga izi nzoga, bagategereza icyemezo Minisiteri ifite inganda mu nshingano izafata.
Umuyobozi w’Uruganda Super Sharp multi-business LTD, Nyirimanzi Sylvain avuga ko hakorwa ubugenzuzi mbere basanze inzoga benga zujuje ubuziranenge.
Nyirimanzi avuga ko aho amabwiriza mashya aziye, ari yo atumye inganda zose zatunganyaga ubwoko bw’inzoga benga zifunga.
Ati: “Nta bisobanuro byinshi mfite, ikibazo gihangayikishije ni inguzanyo ya Banki irenga miliyoni 100Frw mperuka gufata, kuko nari natangiye kubaka uruganda ruri kure y’ingo z’abaturage none ndahombye.”
Nyirimanzi avuga ko ubuyobozi bwagombye kureba uko bubahuza n’amabanki bafitiye umwenda, ndetse bukabafasha kubona ibindi bakora.
Iradukunda Seti, umwe mu bakozi b’uruganda avuga ko abahakora bari abakozi 80 bahemberwa ukwezi, akavuga ko muri abo bakozi harimo abiga Kaminuza bishyuraga amafaranga y’ishuri bavanye mu kazi bakora.
Ati: “Amabwiriza yatanzwe yo gufunga no kumena inzoga adusigiye igihombo kinini.”
Abakuriye uruganda n’abakozi bose ntabwo bemera ko inzoga uruganda rwenga zitujuje ubuziranenge bashingiye ku bugenzuzi buheruka gukorwa mu minsi mikeya ishize.
Yakomeje agira ati: “Muri rusange turasaba Leta kongera gusuzuma inganda zujuje ubuziranenge tukongera gukora kuko hakozwe ubugenzuzi bwimbitse basanga hari izo bafunze zujuje ibisabwa.”
Litiro zirenga 13,000 z’inzoga zatangiye kumenwa kuva ku manywa kugeza ku gicamunsi. Meya w’Akarere ka Muhanga avuga ko igikorwa cyo gusuzuma inzoga zitujuje ubuziranenge gikomeje.
MUHIZI ELISÉE
UMUSEKE.RW/Muhanga
