Perezida Cyril Ramaphosa yanduye Covid-19 ahita ajya mu kato

Ku Cyumweru Ibiro by’Umukuru w’igihugu muri Africa y’Epfo byatangaje ko Perezida Cyril Ramaphosa yanduye Covid-19 ndetse arimo kwitabwaho n’abaganga bavura ibimenyetso yagaragaje.

Perezida Ramaphosa yatangiye kumva ko atameze neza ku Cyumweru avuye mu kiriyo cya Perezida FW De Klerk mu mujyi wa Cape Town.

Itangazo ry’Ibiro bya Perezida rivuga ko abantu bose bahuye na Perezida basabwe kugenzura niba hari ibimenyetso bidasanzwe bafite cyangwa bakajya kwipimisha Covid-19.

Nubwo yanduye Covid-19, Cyril Ramaphosa yakingiwe inkingo zombi zayo, inshingano ze yabaye azihaye Visi Perezida David Mabuza.

Ramaphosa yaramaze iminsi mike akoreye ingendo mu bihugu byo muri Africa y’Iburengerazuba, yageze muri Nigeria, Cote d’Ivoire, Ghana no muri Senegal.

Ibiro bye bivuga ko we n’intumwa bari kumwe muri ibyo bihugu byose babanje gupimwa Covid-19 kandi basanga ntayo bafite, ndetse ngo anageze mu gihugu bongeye gupimwa basanga ntayo bafite.

Africa y’Epfo yibasiwe n’icyorezo cya Covid-19 yihinduranyije yitwa Omicron, iyi ihangayikishije Isi yose.

Perezida Cyril Ramaphosa yishyize mu kato mu mujyi wa Cape Town, ndetse ari gukurikiranwa n’abaganga b’Ibitaro bya Gisirikare muri Africa y’Epfo.

UMUSEKE.RW