Nyuma y’umubano mwiza ukomeje gukura umunsi ku wundi hagati y’u Rwanda na Uganda, umuhungu wa Perezida Yoweri Museveni Général Muhoozi Kainerugaba, yagiranye ibihe byiza n’abanya-Gicumbi barimo Meya w’aka Karere, Nzabonimpa Emmanuel.
Ni mu butumire bwa MK Mouvement, bwari bugamije gukomeza gutsura umubano mwiza Uganda ifitanye n’u Rwanda. Meya wa Gicumbi n’itsinda bajyanye muri Uganda, bongeye kwishimira ifungurwa ry’umupaka wa Gatuna uhuza ibihugu byombi.
Meya Nzabonimpa yari yajyanye n’abayobozi b’ikipe ya Gicumbi FC ndetse n’ikipe yose muri rusange isanzwe ikina shampiyona y’icyiciro cya Kabiri mu Rwanda.
Habanje gukinwa umukino wa gicuti wahuje Gicumbi FC na Kigezi Select FC, ubera kuri Stade ya Kigezi iherereye mu Karere ka Kabale muri Uganda. Umukino warangiye amakipe yombi anganya igitego 1-1, bitabaza penaliti zarangiye Abanyarwanda binjijwe 4-2.
Nyuma y’uyu mukino, Abanyarwanda batemberejwe mu bice bitandukanye bigize aka Karere, baganirizwa na Général Muhoozi Kainerugaba uherutse gutangaza ko yifuza kuba Perezida wa Uganda.
Mu mwaka ushize, abicishije ku mbuga nkoranyambaga ze zirimo Twitter, Gen Muhoozi yagize ati “Uburyo rukumbi bwo kwitura mama wanjye ukomeye ni ukuba Perezida wa Uganda! Kandi byanze bikunze nzabigeraho!”
Nyuma y’ibiganiro byatanzwe n’inzego zitandukanye zirimo Meya w’Akarere ka Gicumbi, Gen Muhoozi n’abandi, hahise hahembwa abitwaye neza kurusha abandi muri uyu mukino.
Abanyarwanda bishimiye ibihe bagiriye muri iki gihugu ndetse bizeza abaturanyi ko nibagaruka bazabisangiza abasigaye mu Rwanda, ariko umuhungu wa Perezida Yoweri Museveni, abicishije kuri Twitter yashimangiye ko yagiranye ibihe byiza n’Abanya-Gicumbi ndetse abifuriza kuzasubira mu Rwanda amahoro.
UMUSEKE.RW