Minisiteri y’Ubuzima kuri uyu wa Kane tariki ya 17 Ukwakira 2024,yatangaje ko abantu bane ari bo bari kuvurwa virus ya Marburg .
Iyi Minisiteri ivuga ko kuri iyo tariki a bantu 5 bakize Icyorezo cya Marburg mu bipimo 271 byafashwe .
MINISANTE ivuga ko kuva iki cyorezo cyagera mu gihugu, abamaze kwitaba Imana bazize ni abantu 15. Ni mu gihe abantu bamaze gukira iyi virus ari abantu 43 mu bipimo 4486 bimaze gufatwa.
Iyi Minisiteri ivuga ko “Kuva hatangazwa ko iyi ndwara yageze mu Gihugu, abarwayi bashya n’abo bagiye bahura bagiye baboneka muri bimwe mu bitaro byo mu mujyi wa Kigali, bose bashyizwe mu kato kandi baritabwaho n’abaganga. Kugeza ubu ibipimo bigaragaza ko iyi ndwara itakwiriye mu Gihugu.”
Ibimenyetso bya Marburg birimo kugira umuriro mwinshi, umutwe ukabije, kubabara imikaya, umunaniro, kuruka no gucibwamo.
Abantu bakangurirwa kwirinda kwegera umurwayi ufite ibimenyetso, kwimakaza umuco w’isuku bakaraba intoki no kwirinda gusuhuzanya bakoranaho nk:ingamba zo kwirinda Marburg.
UMUSEKE.RW