Urubyiruko rwarihiwe ishuri ryimyuga banahawe ibikoresho bifite agaciro ka miliyoni 55 frw, basabwa kubibyaza umusaruro.
Abarihiwe amashuri y’imyuga ariyo ubwubatsi, kudoda, kubaza n’iyindi bose hamwe barihiwe amashuri y’imyuga mu gihe cy’amezi atandatu bikozwe n’Akarere ka Nyanza gafatanyije n’umushinga wa Brac witwa Youth Empowerment Accelerator for Health (YEAH) uterwa inkunga na UNFPA aho bahawe ibikoresho byose byabafasha gushyira mu bikorwa ibyo bize.
Umuyobozi w’umushinga YEAH mu karere ka Nyanza, Mukeshimana Adeline, yavuze ko ibyo bakoze bagira ngo borohereze abo barihiye amashuri y’imyuga gushyira mu bikorwa ibyo bize.
Yagize ati”Ibyakozwe ni mu rwego rwo kugira ngo abo twarihiye biborohere gushyira mu bikorwa ibyo bize nta mbogamizi bahuye nazo kuko urumva iyo wigishije umuntu ku buntu ukanamuha ibizamufasha gushyira mu bikorwa ibyo yize biba byiza, twe ntacyo tutakoze ahasigaye ni ahabo.”
Bamwe muri uru rubyiruko rwarihiwe amashuri y’imyuga rukanahabwa ibikoresho bavuze ko ibyo bakorewe ari nzira nziza zo kubafasha kujya guhangana ku isoko ry’umurimo.
Uwitwa Kubwimana Moussa wize gusudira yagize ati”Aya mahirwe twabonye tugiye kuyabyaza umusaruro dushimira umushinga YEAH wabidufashijemo tukaba tubigezeho.”
Mugenzi we witwa Niyonzima Eric wize ubufundi nawe yagize ati”Ubundi byabaga byagoranaga kwiga noneho kugirango ujye ku isoko ry’umurimo nta bikoresho umuntu afite akenshi umuntu yanasozaga kwiga nta n’igishoro kibikoresho afite ariko ibyo byakemutse ubu nta rwirwatwazo tugiye kubikoresha akazi.”
Umuyobozi w’Akarere ka Nyanza wungirije ushinzwe imibereho myiza y’abaturage,, Kayitesi Nadine yasabye uru rubyiruko ko ibyo bize n’ibikoresho bahawe nk’inkunga igomba kubafasha bakabibyaza umusaruro bikanaborohera gukora ibyo bize.
Yagize ati”Ibikoresho muhawe sibyo kugurisha ahubwo nibyo kubafasha kwigira mukava ku rwego rumwe mukajya kurundi maze mukiteza imbere.”
- Advertisement -
Akarere ka Nyanza gafatanyije n’umushinga wa Brac witwa YEAH uterwa inkunga na UNFPA barihiye amashuri y’imyuga urubyiriruko 100 bahise banahabwa ibikoresho bazifashisha gushyira mu bikorwa ibyo bize.
Banahaye kandi ibikoresho amakoperative atanu arimo abafite ubumuga, ababyina imbyino gakondo n’ayandi aho byose hamwe byatwaye amafaranga arenga miliyoni 55 Frw.
NSHIMIYIMANA Theogene
UMUSEKE.RW/ NYANZA