Amakuru ava mu Burundi, aremeza ko i Bitaro bya gisirikare bya Kamenge, biherereye mu Mujyi wa Bujumbura, birwariyemo inkomere nyinshi zakomerekeye ku rugamba muri Repubulika Iharanira Demokarasi ya Congo.
Amakuru avuga ko ibi Bitaro byari bisanzwe birwariramo ababyeyi n’abana ariko basabwe kuba bahavuye, ngo izi nkomere zibashe kwitabwaho.
Ikinyamakuru SOS Media burundi kivuga ko abarwayi bari barahawe rendez-Vous yo kuzabagwa, basabwe nabo gusubika icyo gikorwa.
Umusaza w’imyaka 60 yabwiye iki kinyamakuru ati “ Ntegereje ibyumweru bibiri byose .Uyu munsi nibwo bambwiye ngo gahunda yakuweho, ngomba kureba undi muganga.”
Umwe mu barwayi yavuze ko “ Aba basirikare barembye cyane kuko bari kuzanwa bakometse cyane umutwe,amaboko n’amaguru.”
Umusirikare nawe wakomeretse yavuze ko hari n’abarirwariye mu ndembe kuko barashwe bikomeye na M23.
Ati “ Ejo babiri muri twe boherejwe mu ndembe(Intensive Care Unit). Twararashwe cyane ubwo twarwanaga n’umutwe wa M23.”
SOS Media Burundi ivuga ko kuba ibi Bitaro byakubakwa , aharwariraga n’ababyeyi abana bari munsi y’imyaka 15 hari kurwarira aba basirikare .
Icyakora iki kinyamakuru kivuga ko kitabashije kumenya neza umubare w’inkomere zose ziri mui ibi Bitaro .
- Advertisement -
Gusa umwe mu baganga yavuze ko “ Kuwa mbere w’iki cyumweru no kuwa kabiri , buri munsi bakiraga abari hagati ya 40-50 .”
Umuvugizi w’Igisirikare cy’u Burundi, Brigadier General Gaspard Baratuza,aherutse gutangaza ko abasirikare boherejwe mu mirwano muri RD Congo bicwa kubera ko bari ku rugamba kandi n’undi wese yapfa mu buryo butandukanye.
Avuga ko kenshi ibivugwa ko ingabo z’u Burundi ziri muri Congo ziri kuneshwa no kwicwa ari ibiba bigamije gukura imitima y’Abarundi.
Ati “ Imibare bohereza ni ukugira ngo batere ubwoba, bahahamure mwebwe Abarundi, mwumve muti abana bacu bahonnye.”
Yavuze ko igisirikare gifite imirongo gikoresha mu kumenyesha imiryango y’abasirikare bapfira ku rugamba, kandi ko iyo miryango ifashwa.
Ahakana abavuga ko u Burundi buhisha amakuru y’abapfira ku butaka bwa Congo.
Ati“Uwitabye Imana baramuzana, n’aho yaba ari muri Centrafrique cyangwa muri Somalia, nkanswe aho duhana urubibi, baramuzana. Babihishira iki? Ntabyo guhisha.”
U Burundi bwohereje ingabo muri Repubulika Iharanira Demokarasi ya Congo ku bw’umvikane bw’impande zombi. Ni nyuma yaho ingabo z’Umuryango wa Afurika y’Iburasirazuba zirimo n’iza Kenya zari zagiye gutanga umusanzu, zifashe icyemezo zikisubirira mu gihugu cyazo.
UMUSEKE.RW