Ubutegetsi bwa Irani bwamanitse umugabo wahamwe n’icyaha cyo gukorera ubutasi urwego rwa Mossad rwa Israel, muri Iran.
Ibinyamakuru byo muri Iran bivuga ko uyu mugabo wamanitswe ku wa Gatatu yakoraga muri komite y’ingabo za leta kandi ko yagiranye imikoranire myinshi na Mossad.
Ku wa Kabiri, Irani yishe undi mugabo wari mu myigaragambyo yo muri Mutarama, inamushinja kuba yaragiranye imikoranire na Mossad.
Iki gihugu kimaze kwica abantu barenga icumi kuva intambara yatangira; bamwe bashinjwa gutatira Israel, abandi bashinjwa kuba mu mutwe utavuga rumwe n’ubutegetsi wa Mojahedin-e Khalq Organization.
Hagati aho, ubutabera bwa Iran bwamaganye ku wa Kabiri amakuru avuga ko abagore umunani bari mu nzira yo kwicwa, nyuma y’uko Donald Trump yasabye ko barekurwa.
Mizan News Agency yavuze ko Perezida Trump yayobejwe n’amakuru y’ibinyoma yakwirakwijwe n’ibinyamakuru bitavuga rumwe n’ubutegetsi.
Iki kinyamakuru kivuga ko bamwe muri abo bagore bamaze kurekurwa, mu gihe abandi bashinjwa ibyaha bidahanishwa igihano cy’urupfu.
NDEKEZI JOHNSON / UMUSEKE.RW
