Ibitaro bya Kaminuza bya Kigali (CHUK) byatangaje ko itsinda ry’inzobere mu kuvura indwara zifata urwungano ngogozi ryakuye mu nda y’uruhinja rw’amezi atanu igice cya ‘Tournevis’ rwari rwaramize, bitabaye ngombwa ko rubagwa.
Ibi bitaro byatangaje ku rubuga rwa X ku wa 18 Nzeri 2026 ko iki gikorwa cyakozwe n’itsinda ry’abaganga bakoresha uburyo bwa ‘Endoscopy’, riyobowe na Dr. Gaspard Habimana, inzobere mu buvuzi bw’abana ku ndwara zifata urwungano ngogozi, umwijima n’urwagashya.
CHUK yagize iti “Ibi byatumye uwo mwana atabagwa bisanzwe, bityo biba intambwe ikomeye mu iterambere ry’ubuvuzi bukoresha ‘Endoscopy’ mu Rwanda.”
Si ubwa mbere mu Rwanda, umurwayi akuwe ikintu mu nda bidasabye ko abagwa.
Mu 2022, abaganga bo muri CHUK nabwo bifashishije uburyo bwa ‘Endoscopy’ bakura ikiyiko kinini mu nda y’umurwayi wari wakimize.
‘Endoscopy’ ni uburyo bwifashisha agakoresho kameze nk’agapira (tube) gafite kamera, kakanyuzwa mu mwenge ku mubiri w’umuntu, nko mu kanwa, mu mazuru, mu gitsina cyangwa mu kibuno hagamijwe kureba ibiri imbere mu mubiri.
Abaganga bakoresha ubu buryo bashobora kureba niba mu rwungano ngogozi harimo udusebe, ibimenyetso bya kanseri cyangwa ibindi bibazo by’igogora, ndetse no gukuramo ikintu umuntu yamize.
Mu myaka ibiri ishize, CHUK yakiriye imashini izwi nka ‘Endoscopic Ultrasound (EUS)’, ifasha kureba imiterere n’imikorere y’ingingo z’imbere mu mubiri.
Iyi mashini ihuza ikoranabuhanga rya ‘Endoscopy’ na ‘Ultrasound’, rikifashishwa mu gutahura indwara mbere y’uko zikomera cyangwa zigira ingaruka zikomeye ku murwayi.
MUGIRANEZA THIERRY/ UMUSEKE.RW
