Abantu 11.042 bamaze kwemezwa ko banduye Ebola muri Repubulika Iharanira Demokarasi ya Congo (RDC), mu gihe 5.387 bamaze guhitanwa na yo kuva iki cyorezo cyo mu bwoko bwa Bundibugyo cyagaragara muri Gicurasi 2026.
Raporo y’inzego z’ubuzima muri Congo igaragaza ko kugeza ku wa 9 Ugushyingo 2026, abantu 2.990 bari bamaze gukira Ebola.
Abandura bashya bagaragara cyane mu ntara za Ituri, Kivu ya Ruguru na Haut-Uélé. Ituri ni yo ikomeje kwibasirwa cyane n’iki cyorezo, kuko ari ho habarurwa hafi 70% by’abamaze kwemezwa ko banduye Ebola mu gihugu hose.
Iyi mibare igaragaza ko icyorezo gikomeje gukwirakwira, nubwo inzego z’ubuzima zikomeje ibikorwa byo guhangana na cyo.
Raporo y’inzego z’ubuzima igaragaza ko umutekano muke mu duce twibasiwe na Ebola uri mu mbogamizi zikomeye zituma ibikorwa byo kuyirwanya bidindira.
Ikindi kibazo ni amakuru atari yo akomeje gukwirakwizwa mu baturage, bigatuma bamwe batizera ingamba z’inzego z’ubuzima, bityo kumenya abanduye hakiri kare no kubashishikariza kwivuza bikagorana.
Iki ni icyorezo cya kabiri cya Ebola cyahitanye abantu benshi mu mateka y’Isi, nyuma y’icyahitanye abarenga 11 000 muri Guinea, Liberia na Sierra Leone hagati ya 2014 na 2016.
Ebola yo mu bwoko bwa Bundibugyo ikomeje kwibasira RDC kuva muri Gicurasi 2026. Kugeza ubu, nta rukingo cyangwa umuti byihariye byemejwe kuri ubu bwoko bwa Bundibugyo.
Mu mpera za Kanama 2026, i Kinshasa hakiriwe icyiciro cya mbere cy’inkingo 16, 520 mu nkingo 50, 120 iki gihugu giteganya kwakira mu rwego rwo guhangana na Ebola.
Ishami ry’Umuryango w’Abibumbye ryita ku Buzima (OMS) ryatangaje ko inkingo zo mu bwoko bwa Ervebo zishobora kwifashishwa mu guhangana n’iki cyorezo, hashingiwe ku kuba zarigeze gukoreshwa mu kurwanya Ebola yo mu bwoko bwa Zaire, yishe abarenga 11.000 mu Burengerazuba bwa Afurika hagati ya 2014 na 2016.
UMUSEKE.RW
