Ebola yo mu bwoko bwa Bundibugyo muri Repubulika Iharanira Demokarasi ya Congo (RDC) yanditse amateka yo kuba icyorezo cya kabiri cyo mu bwoko bwa Ebola cyishe abantu benshi, nyuma y’uko abamaze guhitanwa na cyo bageze ku 4, 018 mu bantu 8, 300 bamaze kucyandura kuva muri Gicurasi 2026.
Imibare yashyizwe hanze n’inzego z’ubuzima muri Repubulika Iharanira Demokarasi ya Congo kuri uyu wa Gatanu, tariki ya 2 Ukwakira 2026, yerekana ko iki cyorezo cyageze mu ntara zirindwi za Congo, zirimo Ituri, Kivu y’Amajyaruguru, Haut-Uélé, Tshopo, Kivu y’Amajyepfo, Sud-Ubangi na Bas-Uélé.
Mu bantu 8, 300 banduye Ebola muri Congo kuva muri Gicurasi 2026, abagera ku 4, 018 barapfuye, mu gihe abandi 2, 000 bakize.
Iki ni icyorezo cya kabiri cya Ebola cyahitanye abantu benshi mu mateka y’Isi, nyuma y’icyahitanye abarenga 11 000 muri Guinea, Liberia na Sierra Leone hagati ya 2014 na 2016.
Ishami ry’Umuryango w’Abibumbye ryita ku Buzima (OMS) riheruka gutangaza ko iki cyorezo kigenda kigabanuka, by’umwihariko mu Ntara ya Ituri, aho cyatangiriye. Icyakora, mu Ntara ya Kivu y’Amajyaruguru, umubare w’abandura ukomeje kwiyongera.
Ebola yo mu bwoko bwa Bundibugyo ikomeje kwibasira RDC kuva muri Gicurasi 2026. Kugeza ubu, nta rukingo cyangwa umuti byihariye byemejwe kuri ubu bwoko bwa Bundibugyo.
Mu mpera za Kanama 2026, i Kinshasa hakiriwe icyiciro cya mbere cy’inkingo 16, 520 mu nkingo 50, 120 iki gihugu giteganya kwakira mu rwego rwo guhangana na Ebola.
Ishami ry’Umuryango w’Abibumbye ryita ku Buzima (OMS) ryatangaje ko inkingo zo mu bwoko bwa Ervebo zishobora kwifashishwa mu guhangana n’iki cyorezo, hashingiwe ku kuba zarigeze gukoreshwa mu kurwanya Ebola yo mu bwoko bwa Zaire, yishe abarenga 11.000 mu Burengerazuba bwa Afurika hagati ya 2014 na 2016.
