Impuzamashyirahamwe y’Umupira w’Amaguru muri Afurika, CAF, yegeneye abasifuzi benshi mpuzamahanga b’Abanyarwanda, imikino Nyafurika ya CAF Champions League, CAF Confederation Cup 2026 ndetse n’imwe mu mikino yo gushaka itike y’Igikombe cya Afurika 2027.
CAF yegennye ko Uwikunda Samuel ari we uzayobora umukino uzahuza Ibirwa bya Comores na Namibia mu gushaka itike y’Igikombe cya Afurika 2027.
Azaba yungirijwe na Mutuyimana Dieudonné ‘Dodos’, Ishimwe Didier na Nsabimana Céléstin nk’umusifuzi wa Kane. Ni umukino uteganyijwe kuzakinwa ku wa 29 Nzeri 2026.
Rulisa Patience we yahawe kuzayobora umukino uzahuza Pyramids FC yo mu Misiri na Gor Mahia yo muri Kenya mu mukino w’ijonjora ry’ibanze muri CAF Champions League.
Muri uyu mukino uteganyijwe kuzakinwa ku wa 13 Nzeri 2026, Rulisa azakorana na Mutuyimana Dieudonné na Mugabo Eric mu gihe Uwikunda Samuel azaba ari umusifuzi wa Kane kuri uyu mukino.
Nsabimana Céléstin yahawe kuzayobora umukino wa CAF Confederation Cup uzahuza AS Psi yo muri Tchad na Club Omnisports de Korhogo yo muri Côte d’Ivoire.
Uyu mukino uzakinwa ku wa 4 Nzeri 2026, Céléstin azakorana na Ishimwe Didier na Habumugisha Emmanuel mu gihe Uwikunda Samuel azaba ari umusifuzi wa kane kuri uyu mukino.
Mu gihe aba basifuzi mpuzamahanga b’Abanyarwanda bagiye kuyobora iyi mikino, na bashiki babo, Umutoni Aline na Umutesi Alice, bakubutse muri Maroc gusifura Igikombe cya Afurika cy’Abagore cyarangiye Cameroun ari yo icyegukanye.
Ibi bigaragaza icyizere CAF ikomeje kugirira abasifuzi b’Abanyarwanda.
UMUSEKE.RW
