Mu Rwanda hatangiye inama y’iminsi itatu irebera hamwe uko urubyiruko rwa Afurika,rwahanga udushya bakoresheje ubwenge buhangano.
Ni inama yiswe ‘AIESEC Alumni MEA Conference yatangiye 21-23 Kanama 2026,yiga uko urubyiruko rwatera imbere mu ikoranabuhanga no guhanga udushya,bagendeye ku ikoranabuhanga ry’ubwenge buhangano,AI.
Iyi nama iri guhuza ibihugu 20 byo muri Afurika y’Iburasirazuba no mu Burasirazuba bwo hagati.
Tarsila Faustine Melitta wo muri Tanzania akaba ari rwiyemezamirimo mu ikoranabuhanga ( A social entrepreneur and innovator).
Uyu asanga urubyiruko rwa Afurika rukwiye kubyaza umusaruro ikoranabuhanga ry’ubwenge buhangano.
Ati “Turi hano kugira ngo dufashe Isi mu gutanga ibisubizo ikeneye mu ikoranabuhanga. Muri iyi nama tuzarushaho kumenya uburyo twahanga udushya mu ikoranabuhanga, kwihangira imirimo nk’urubyiruko n’andi mahirwe urubyiruko rufite.”
Akomeza agira ati “ Mu cyerekezo 20250, Isi izaba iri ku muvuko w’ikoranabuhanga . Ni ngombwa ko tugomba guhuza no kugirana ubumwe nk’urubyiruko rwa Afurika kugira ngo tubashe kujyana n’uwo muvuduko no kubyaza umusaruro amahirwe ahari.”
Mutembei Victor wo muri Kenya nawe asanga urubyiruko rudakwiye kugirira ubwoba ubwenge buhangano ku isoko ry’umurimo ahubwo ari amahirwe ahari ngo rubashe kwiteza imbere.
Ati “AI ntabwo izasimbura akazi kakorwaga, ahubwo izasimbura abantu badakoresha neza iryo koranabuhanga. Urugero ushobora kuyikoresha ikagufasha kwihutisha akazi nko gukora ubushakashatsi, mu kazi kawe ka buri munsi. N’uyikoresha neza mu kazi kawe, izarushaho kukugirira umumaro mwinshi kandi mu gihe gito . Ariko ntabwo twavuga ko izasimbura akazi.”
Mahoro Irakiza Pacifique uri mu bategura iyi nama AIESEC Alumni MEA Conference mu Rwanda, asanga ari amahirwe ku rubyiruko rwa Afurika ngo rubyaze umusaruro rufite.
Ati “Haba hakenewe amahugurwa nkaya kugira ngo abantu bige gukoresha AI,kugira ngo iterambere iri kutujyanamo ,bajyanemo naryo. Aho kugira ngo batakaze imirimo kubera AI ahubwo babashe kunguka imirimo kubera AI.”
Muri iyi nama iri kubera mu Rwanda, biteganyijwe ko hazamurikwa imishinga itandukanye yahanzwe n’urubyiruko bifashishije ikoranabuhanga ry’ubwenge buhangano AI.
TUYISHIMIRE Raymond
UMUSEKE.RW
