Uwahoze ari Umunyamabanga Mukuru w’Impuzamashyirahamwe y’Umupira w’Amaguru ku Mugabane wa Afurika [CAF], Véron Mosengo, yatorewe kuyobora Ishyirahamwe ry’Umupira w’Amaguru iwabo muri Repubulika Iharanira Demokarasi ya Congo [FECOFA] mu myaka ine iri imbere.
Muri aya matora yabereye mu nteko rusange y’abanyamuryango ba FECOFA tariki ya 20 Gicurasi 2026, Veron Mosengo yatowe ku majwi 60 kuri 65.
Umwanya wo kuyobora iri Shyirahamwe, wari wiyamamajeho abakandida icyenda barimo Chris Shabani Nonda, Aziz Makukula, Max Mayaka, Didier Masamba, Kévin Issa, Bosco Mwehu, Pathou Mangenda, JC Mukanya na Véron Mosengo watowe.
Tariki ya 29 Werurwe 2026, ni bwo Véron Mosengo-Omba yeguye ku Bunyamabanga Bukuru biciye mu ibaruwa yandikiye Komite Nyobozi ye.
Mosengo wari umaze imyaka itanu ku Bunyamabanga Bukuru bw’uru rwego ruyobora Ruhago ku Mugabane wa Afurika, icyo gihe yeguye kuri izi nshingano nyuma y’umwuka mubi wari umaze iminsi kubera kwakwa Igikombe cya Afurika kwa Sénégal, cyahawe Maroc.
UMUSEKE.RW
