Muri Repubulika Iharanira Demokarasi ya Congo (DRC), indege itwara imizigo yari yaraburiwe irengero kuva ku wa Gatanu, tariki ya 24 Nyakanga 2026, yabonetse ku Cyumweru yarakoze impanuka muri Teritwari ya Walikale, mu Ntara ya Kivu y’Amajyaruguru.
Iyi ndege ya Sosiyete ya Tracep Congo Aviation yari ivuye i Beni, mu Ntara ya Kivu y’Amajyaruguru, yerekeza i Kachungu, muri Teritwari ya Shabunda, mu Ntara ya Kivu y’Amajyepfo. Yari itwaye abantu babiri n’imizigo ipima hafi toni ebyiri.
Amakuru yatanzwe n’ishami rishinzwe iby’indege za gisivili muri DRC avuga ko iyi ndege yahagurutse ku Kibuga cy’Indege cya Mavivi, i Beni, ku wa Gatanu saa 12:36 ku isaha y’aho.
Nyuma y’iminota mike ihagurutse, umupilote wari uyitwaye yatanze ubutumwa atabaza, avuga ko imwe muri moteri ebyiri z’indege yari yagize ikibazo.
Kapiteni yahise agerageza kuyerekeza ku Kibuga cy’Indege cya Walikale kugira ngo ayimanure, ariko nyuma yaho indege ibura kuri radari ndetse n’itumanaho ryayo rirahagarara.
Nyuma y’iminsi itatu ishakishwa, iyi ndege yabonetse ku Cyumweru tariki ya 26 Nyakanga 2026 nimugoroba mu gace ka Kamaninge muri Teritwari ya Walikale.
Umupilote wari uyitwaye yitabye Imana, mu gihe umwungirije we yarokotse.
MUGIRANEZA THIERRY/ UMUSEKE.RW
