GISAGARA: Amakuru UMUSEKE wamenye avuga ko Umuyobozi w’Akarere wungirije Ushinzwe Imibereho myiza y’abaturage, Dusabe Denise n’Ukuriye RIB, DCI, bafunzwe.
Amakuru UMUSEKE ukesha imboni zawo ziri muri aka Karere avuga ko Inzego z’Ubugenzacyaha zataye muri yombi Visi Meya, Dusabe Denise n’Umuyobozi wa RIB muri aka Karere, Rangira Anicet bafunzwe bakekwaho ko bafatanywe ruswa ya miliyoni 4 y’amafaranga y’u Rwanda.
Abatanze amakuru bavuga ko izo miliyoni 4 Frw bari bazihawe n’Umukomisiyoneri Padiri w’imwe muri Paruwasi yo mu Idini Gatolika yo muri aka Karere yari yohereje.
Ayo makuru akavuga ko aba bayobozi bombi bamenye amakuru ko hari umuterankunga wahaye uyu Padiri miliyoni zirenga 20 zo gusana Ishuri, ayakubita umufuka.
Umwe mu batanze amakuru yagize ati: “Bamaze kumenya ko Padiri atagikoresheje iyo nkunga bamwotsa igitutu bashaka ko bayagabana kugeza ubwo yemeye ko aza kubaha izo miliyoni 4Frw.”
Uwatanze amakuru yabwiye UMUSEKE ko bashyizeho Komisiyoneri, Padiri amaze kuyamuha uyu mugabo ahamagara aba bayobozi ababwira ko abazaniye ayo mafaranga bamubwira aho abasanga, atangiye kuyabaha RIB ibagwa gitumo ihita ibafunga.
Visi Meya Dusabe Denise yari arangije Manda y’imyaka 5, ubu yari ku rutonde rw’abakandida bahatanira kwiyamamariza umwanya w’abajyanama rusange b’Akarere ka Gisagara.
Abatanze amakuru bavuga ko bataramenya niba Padiri wahaye abo Bayobozi ruswa ariwe wongeye gutanga amakuru ko Visi Meya n’Umuyobozi wa RIB barimo kumwaka ruswa cyangwa niba Inzego z’Ubugenzacyaha zari zamenye ko Dusabe na DCI batangiye gusaba uyu Muyobozi wa Paruwasi ruswa y’ayo mafaranga.
MUHIZI ELISÉE UMUSEKE.RW/Gisagara
Abashinzwe kurwanya Ruswa,nabo barya ruswa kandi ku bwinshi.Reba n’uyu mupadiri byitwa ko yihaye Imana,akanyereza amafaranga angana gutya.Wasanga afite n’ihabara baryamana.Kubera ko ibyaha byinshi bikorwa rwihishwa,Imana niyo yonyine imenya abeza n’ababi.Kuraho bimwe bavuga ngo Paapa ni “nyirubutungane”.Mu gihe bible ivuga ko Imana yonyine niyo nyirubutungane.Mu kurimbura abanyabyaha ku munsi wa nyuma,ikazasigaza abeza gusa nkuko Imigani 2:21,22 havuga,ntawe izibeshyaho.Kuli uwo munsi,izazura abantu bapfuye baririndaga gukora ibyo itubuza,nabo ibahe ubuzima bw’iteka.Niba utabyemera,waba upinga Imana yabivuze.Ntabwo wemera se ko ishobora byose kandi itajya ibeshya ?
Wapi wapi… iyi case bashishoze neza ifite aho ihuriye nabatifuza ko VC Mayor ari we wenyine mu bagombaga kuzagaruka muri mandat itaha! Ababishinzwe bakurikirane cyane. Murakoze