Nyuma yo gutsinda Jamus FC ibitego 2-1, Al-Hilal SC ni yo yegukanye umwanya wa Gatatu mu irushanwa rya CECAFA Kagame Cup 2026.
Umukino wo guhatanira umwanya wa Gatatu, wataniye Saa Cyenda z’amanywa kuri Stade Amahoro.
Amakipe yombi yacunganye mu minota 45 y’igice cya mbere, irangira nta kipe n’imwe ibashije kubona izamu ry’indi.
Ubwo amakipe yombi yagarukaga mu gice cya Kabiri, Al-Hilal SC yatangiye isatira cyane ndetse biza kuyihesha igitego cyatsinzwe na Ansumana Samura ku munota wa 54.
Ntabwo byarangiriye aho kuko aba banya-Sudani bakomeje gusatira cyane, ku munota wa 66 bongera kubona inshundura ku gitego cyatsinzwe na Omer Taha.
Jamus FC ntabwo yigeze icika integer, yakomeje gusunika ngo irebe ko yagabanya umubare w’ibitego bibiri yari imaze gutsindwa.
Abanya-Sudani y’Epfo baje kubona igitego cy’impozamarira ku munota wa 90, batsindiwe na Simon Majak, ndetse umukino urangira Al-Hilal SC yegukanye umwanya wa Gatatu muri CECAFA Kagame Cup 2026 ku ntsinzi y’ibitego 2-1.
Saa Kumi n’Ebyiri z’Umugoroba, hateganyijwe umukino wa nyuma uza guhuza Rayon Sports na Gor Mahia yo muri Kenya.
UMUSEKE.RW
