Rwanda

Umuvunyi Mukuru avuga ko bidakwiye ko abayobozi babwira abaturage batibonye ku ntonde zitandukanye akenshi zibafasha guhabwa serivisi ko kuba bataziriho ari ukubera ko ‘Imashizi zabasimbutse’, ngo ntibigomba kuba umuco kuko byaba bisa no kwirengagiza ibibazo by’abo bayobora.

Anastase Murekezi, Umuvunyi Mukuru yari mu murenge wa Rambura, mu karere ka Nyabihu kuri uyu wa 16 Gicurasi, mu bukangurambaga bugamije gusobanurira abaturage amategeko abarengera n’uburemere bwa ruswa mu gihugu n’imibanire yabo n’abayobozi, bamwe mu baturage bamugejejeho ibibazo by’uko hari serivisi batagihabwa kubera ko batibonye kuri lisiti.

Anna Mariya ni umukecuru wo mu murenge wa Rambura yagize ati: “Nyakubahwa muyobozi, nabaga mu ba DS (Direct Support) ariko ubu ntabwo nkirimo kandi ndi umukene, urabona ndashaje.”

Umuvunyi yahise amubaza ati: “Hanyuma se wabajije abayobozi bakubwira ko ari iyihe mpamvu utari ho?”  – Anna Mariya ati: “Barambwiye ngo imashini yaransimbutse.”

Ikibazo cy’uyu mukecuru cyakemuriwe mu ruhame, Umuvunyi yasabye abamuzi kuvuga uko bamuzi niba koko akwiriye kuba yajya mu bahabwa ubu bufasha bw’ingoboka yihuse (Direct support). Abamuzi bahise bemeza ko uyu mukecuru ari umukene kandi ko nta bantu afite bashobora kumufasha.

Umuvunyi yabajije Umunyamabanga Nshingwabikorwa w’Akagari ka Nyundo uyu mukecuru atuyemo, icyo amuvugaho na we avuga ko azi neza ko uyu mukecuru w’umukene, ko ariko atasohotse ku rutonde rwavuye muri Minisiteri ruriho abaturage bakwiye guhabwa amafaranga y’ingoboka.

Uyu Gitifu w’aka kagari avuga ko n’ubwo hari abayobozi byavuzwe, we atari ko abibona kuko ngo “imashini ntabwo ari zo zikoresha, ahubwo zikoreshwa n’abantu”.

Umuvumyi Mukuru avuga ko bidakwiye ko abayobozi babwira abaturage babo batagaragara kuri lisiti zitandukanye ngo ibyabaye ni imashini (Computers) zabiteye, ko ahubwo bagomba kunoza serivisi bakwiriye guha abaturage.

Ati: “Uriya muyobozi w’akagari yabivuze neza, ntabwo izo mashini zikoresha. Ahubwo abayobozi bakagombye kuba bamenya neza ikibazo cyabaye. Uyu muco wo kubwira abantu gutya ugomba gucika kuko byaba ari nko kwirengagiza ibibazo by’abaturage, ndetse byaba byiza birangiye kuko no muri iyi minsi hari benshi bahura na byo nko muri iri vugurura ry’ibyiciro by’Ubudehe.”

Ubu bukangurambaga burimo gukorerwa mu mirenge yose igize Akarere ka Nyabihu, kuri uyu wa kane, Umuvunyi Mukuru yifatanyije n’abaturage abakangurira kwirinda kugura servisi bafiteho uburenganzira. Yabaganirije no ku bubi bwa ruswa ndetse no kuyirwanya hanirindwa akarengane.

Emile DUSENGE
UMUSEKE.RW/Nyabihu

Imiryango itandatu yo mu murenge wa Rurembo mu karere ka Nyabihu, ivuga ko muri Gicurasi umwaka ushize (2018) muri ako gace haguye imvura nyinshi iteza ibiza, byarimo inkangu no gusenyuka kw’inzu bari batuyemo, ngo barabaruwe hanyuma bemerarwa isakaro, kugeza ubu ntibararibona ndetse hari n’abubatse bafite impungenge ko imvura izabisenya kubera kutagira isakaro, icyo kibazo bakibwiye Umuvunyi Mukuru.

Bavuga ko nyuma y’iyo mvura ubuyobozi bwaje bubarura ibyabo byangiritse, hanyuma bubemerera ko buzabaha amabati yo gusakara kubera ko inzu zabo za mbere zari zisakajwe amategura zasenyutse akangirika.

Ubu ngo babayeho nabi kubera ko bacumbikirwa n’abaturanyi, ariko bakanavuga ko hari abandi bahawe imfashanyo y’amabati, bo ntibayahabwa, kandi bari bayemerewe mu mwaka ushize.

Sebagoyi Francois w’imyaka 68 y’amavuko, inzu ye yarasenyutse muri icyo gihe, ashyira abayobozi mu majwi ko bamushishikarije kubaka vuba kugira ngo ahabwe amabati we na bagenzi be bahuje ikibazo, ariko ngo yaje gutungurwa n’’uko hari abandi bayahawe bo ntibayabona.

Ati: “Twemerewe amabati ariko ntabwo bayaduhaye, hari n’ayaje baravuga ngo si ayacu; ayacu yo ntabwo yari yaza.”

Avuga ko Agoronome yamubwiye ko yubaka vuba ko amabati yenda kuza. Ati “Nkora uko nshoboye, ubu inzu yaruzuye icyo yabuze ni amabati. Ubu iri aho, iri kunyagirwa ahubwo ishobora no gusenyuka. Ikibazo dufite sinzi niba koko tuzayabona.”

Mukanoheli Jacqueline, utuye mu kagari ka Kibisaho, muri uyu murenge wa Rambura, na we avuga ko ibiza byamusenyeye, akaza kubakirwa n’imiganda y’Abakristu basengana, ngo iyo bataba bo we ubwe ntiyari kubasha kwiyubakira kuko ari umupfakazi ufite abana bane.

Ati: “Ibiza byaransenye ngira Imana Abakristu baza kunyubakira, ariko kubera ko twari twaremerewe isakaro na Leta kugeza n’ubu ntabwo ndayijyamo. Aho mba ni mu nzu y’abana b’abaturanyi, mpaba mu gihe bari mu mashuri ariko iyo baruhutse njya mu kizu cyange nkarundanya udusazira tw’amategura akaba ari mwo tujya turara.”

Mukanoheli akomeza avuga ko nta bushobozi bwatuma we ku bwe yibonera isakaro.

Ati: “Ndi umupfakazi uri mu kiciro cya mbere cy’Ubudehe, ndetse umwana wange umwe aba i Ndera mu bitaro by’abafite uburwayi bwo mu mutwe, aho ntanga yo 8000 Frw buri kwezi kandi mbara ijoro cyangwa umunsi iyo mvuye guca inshuro.”

Ubuyobozi bw’Umurenge wa Rambura buvuga ko ikibazo k’iyi miryango kizwi, ndetse ko bwanabakoreye ubuvugizi bakabaha ikizere ko bazahabwa isakaro. Iri sakaro ariko ntabwo riragera ku Karere ngo baracyaritegereje.

Ku bijyanye n’abubatse bikaba bishobora gusenyuka kubera izo nzu zidasakawe, ubuyobozi buvuga ko bwagiriye inama abo baturage yo gutwikiraho amasashi, ngo birabafasha kuko ntabwo zirasenyuka.

Mukandayisenga Antoinette, Umuyobozi w’akarere ka Nyabihu, yemeza ko icyo kibazo na we akizi, ndetse ngo kiri hafi gukemuka. Avuga ko abo baturage bavuga ngo amabati y’abandi yaraje batagomba kubigiraho ikibazo kuko ayaje yari agenewe abafite ibibazo by’imibereho bagomba kwitabwaho (Human security issues).

Ati: “Kuba amabati ya bano bantu ataraza si ubukene bw’Akarere, ahubwo twarayasabye barayatwemerera twizeye ko bitarenze muri uku kwa gatandatu bazaba bayabonye, ababanje ni abagenerwabikorwa ba ‘human security’, abahuye n’ibiza bo bari mu kiciro cya kabiri kizakurikiraho.”

Umurenge wa Rambura kimwe n’Akarere ka Nyabihu muri rusange, ni mu gace k’imisozi miremire inagwamo imvura nyinshi cyane, mu gihe k’imvura hakunze kuba ingangu n’ibindi biza bitandukanye bisenyera ndetse bikaba byanatwara ubuzima bw’abantu.

Emile DUSENGE
UMUSEKE.RW/Nyabihu

Kanyankole Alexis wayoboye Banki y’u Rwanda Itsura Amajyambere (BRD) yasabiwe gufungwa imyaka 7 no gutanga ihazabu ya miliyoni 100Frw kubera ibyaha bikomeye byo kunyereza umutungo wa Leta akurikiranyweho,  Kalema Juvenal bareganwa we asabiwe gufungwa imyaka 5 no gutanga ihazabu ya miliyoni 100Frw.

Mu rugereko ruburanisha ibyaha bimunga ubukungu bw’igihugu mu Rukiko Rwisumbuye rwa Nyarugenge niho kuri uyu wa gatanu tariki 17 Gicurasi 2019, aba bombi baburaniye.

Kanyankole Alexis aregwa n’ubushinjacyaha ibyaha bitatu. Icyaha cyo kwakira impano kugira ngo hakorwe ibinyuranije n’amategeko, icyaha cyo gusaba no  kwakira impano cyangwa indonke kugira ngo hakorwe ibinyuranije n’amategeko n’icyaha cyo gufata ikemezo gishingiye ku itonesha.

Kanyankole Alexis wahoze ayobora BRD na Kalema Juvenal wahoze akuriye ishami ritanga inguzanyo muri iyo banki, bombi baburanye bahakana ibyaha byose baregwa n’Ubushinjacyaha.

Umucanza ahaye ijambo Kanyankole ngo yiregure ku cyaha k’itonesha mu gutanga inguzanyo, yavuze ko Uruganda rwa Trust Industries avugwaho kuba yarahaye inguzanyo mu buryo bunyuranyije n’amategeko atari ko biri kuko yabikoze mu rwego rwo kurengera inyungu za BRD.

Yasobanuye ko uru ruganda rushingwa mu 2010, rwari rufite abanyamigabane babiri bari bafite 75% na BRD yari ifitemo 25%.

Yavuze ko ubwo yageraga muri BRD muri 2013 yasanze uru ruganda rumaze guhabwa inguzanyo inshuro eshatu. Yabwiye umucamanza ko yatangiye gukorwaho iperereza ku wa 07/12/2017, akaba amaze amezi 7 afunze arengana, avuga ko atakambira Urukiko ngo rumurenganure.

Kalema Juvenal na we yasabye Urukiko kumurenganura kuko ngo arengana. Yarusabye gukoresha ubushishozi bwarwo ku byaha aregwa n’ibyo yireguje yisobanura.

Ubushinjacyaha bwasabye Urukiko rwisumbuye rwa Nyarugenge kwemeza ibirego byabwo, Kanyankole akazafungwa imyaka 7 akanatanga ihazahabu ya miliyoni 100Frw naho Kalema Juvenal agahanishwa igifungo k’imyaka 5 na we agatanga ihazabu ya miliyoni 100Frw.

Umucamanza yumvise impande ziburana, yanzuye ko isomwa ry’uru rubanza ari ku wa 13/06/2019 Saa cyenda.

Amafoto@NKUNDINEZA

Jean Paul Nkundineza
UMUSEKE.RW

Nyuma y’uko agannye Umuseke ngo umuvugire ikibazo cy’uko atazi inkomoko ye, Eric  Nsengiyumva kuri uyu wa Gatatu yagarutse atubwira ko ubu yamaze kubona abo mu muryango we barimo mukuru we witwa Eric Ndereyimana uba muri Finland, mushiki we uba muri Burera witwa Adeline Mukandayisenga, Nyina uba Uganda na Se uba muri Congo Brazzaville.

Avuga ko nyuma yo kubibwira Umuseke yagiye no ku zindi radio zo mu Rwanda kandi akomeza gushakisha akoresheje imbuga nkoranyambaga na YouTube.

Nyuma ngo hari umuryango wo mu Karere  ka Huye wavuze ko ubona yaba ari umwe mu bawugize bigeze kubura mu gihe cya Joenoside yakorewe Abatutsi ari na bwo Eric yaburanye n’ababyeyi be, biba ngombwa ko bajya gupimisha amaraso (ADN Test) ku bitaro bya Police biri Kakiru ariko ibisubizo biza ari ibyo kumutera ikizere, basanga badahuza.

Ati: “Na mbere y’uko nipimisha n’aba bantu nabonaga nta we dusa, cyangwa ngo tugire ikindi kiduhuza naheraho.”

Avuga ko atacitse intege akomeza gushakisha. Gusa hari bamwe babonye amafoto ye n’abo muri uwo muryango w’i Huye bakabona harimo agasano barebesheje amaso.

Ati: “Nyuma ejo bundi numvise umuntu ampamagaye arambwira ngo yabonye ndimo nshakisha umuryango kuri YouTube asanga nsa n’umwana wabo bagize ibyago arapfa yari bucura iwabo. Arakomeza ati “Ntiyabona uko amvugisha neza”. Yabonye umwanya ansaba ko namuha amafoto akayareba neza.”

Avuga ko yoherereje uwo muntu amafoto arayereba kuri Whats App araseka, na we amwoherereza aye.

Nsengiyumva ati: “Na we yanyoherereje amafoto. Nkibona ifoto ya mbere mbona ni njyewe neza neza. Nyuma yanyoherereje andi menshi nkiyabona nahise numva ikintu cy’ubwoba muri njye.”

Avuga ko yabwiye uwo yita mukuru we ko yamwibiye amafoto!

Yafashe amafoto ye abiri n’iy’uwo yita mukuru we arayahuza arayamwoherereza asanga birasa neza.

Uriya musore yita mukuru we ngo yahise amuha nomero za mushiki we uba mu Rwanda mu Karere ka Burera mu murenge wa Kivuye ngo bavugane.

Eric Nsengiyumva ngo yaramuhamagaye undi yumvise ijwi rye ahita amubwira ko avuga nka Se.

Hagati aho ariko ngo hari ifoto ya Eric Nsengiyumva bari bamaze guha Nyirakuru ubyara Nyina ubana na mushiki we muri Burera asanga barasa neza.

Nyuma y’uko amafoto bayahereyeho buri ruhande rwemeza ko rugomba kuba rufitanye isano n’urundi.

Byabaye ngombwa ko Nsengiyumva afata urugendo abasanga muri Burera basuzuma ibirenge byabo byombi basanga imiterere y’amano, n’imirongo iba mu biganza biteye kimwe, bityo baba babonye ikimenyetso bo bita simusiga cy’uko bafitanye isano ya hafi.

Ati: “Nagezeyo tumaze kubona ko duhuje ibirenge n’intoki bahise batangira kubyina biratinda.”

Avuga ko kuri we n’abandi nta mpamvu yo kwirirwa bajya gukoresha ipima rya ADN kuko bumva bafitanye isano ndetse ikizere kikaba kirenga 100%.

Avuga ko Nyina uba muri Uganda yamubwiye ko yababajwe n’uko bigoye kuza mu Rwanda cyangwa ngo Umunyarwanda ajye Uganda kubera ibibazo biri hagati y’ibihugu byombi ariko ngo ibintu nibisubira mu buryo azaza amusure.

Eric avuga ko namara guhura n’umuryango we wose azatangira ubundi buzima agakora business y’ubuhinzi hafi y’umuryango we kuko ngo n’ubundi wari umugambi yatangiye.

Jean Pierre NIZEYIMANA
UMUSEKE.RW

Minisitiri w’Ubutabera Johnston Busingye yasuye Gereza ya Rubavu kuri uyu wa kabiri tariki 14 Gicurasi 2019, avuga ko ahanini abagororwa bafungiye hariya bakiri bato kuko muri bo 60% bari munsi y’imyaka 40, agasanga ari umubare munini kandi abenshi bafungiwe ibyaha byo Gufata ku ngufu, gukubita no gukomeretsa, ibiyobyabwenge n’ubujura, akabasaba kureka ibyaha ku buryo mu myaka 10 imbere, Gereza ngo zazaba zaragizwe amashuri cyangwa amavuriro.

Busingye asaba urubyiruko kwirinda ibyaha ku buryo mu myaka 10 bizaba byashize burundu, ahubatswe gereza hakazashakirwa ibindi bihakorerwa nk’amashuri n’amavuriro.

Yavuze ku bagororwa basaba imbabazi bakanemera icyaha bari muri gereza, ariko bavugana n’imiryango yabo bakababwira ko barengana cyane cyane babibwira abana bato, avuga ko iyo mvugo yangiza abo bana abasaba gusaba imbabazi zibavuye ku mutima.

Nkurunziza Charles Umugororwa uhagarariye abandi yashimye uburyo bafashwe mu buzima bwabo bwa buri munsi ariko atuma Minisitiri ko batakambira Perezida wa Repubulika agaha imbabazi abokoze Jenoside batemerewe imbabazi kandi baremeye icyaha bakanagisabira imbabazi, ndetse bakaba barahinduye imyitwarire.

Charles yagarutse ku kibazo cy’abasaza bafite hejuru y’imyaka 70 bakuwe muri Gereza ya Gasabo ubwo yashyaga bakimurirwa i Rubavu, kuborohereza bakabafungira ahegereye imiryango yabo kugira ngo bijye biborohera kubageraho kuko aho bazajyanywe habaye kure.

Umuyobozi w’Amagereza mu Rwanda, CGP George Rwigamba Ku kibazo cy’abasaza bakuwe muri Gereza ya Gasabo yavuze ko hari abimurwa muri za Gereza zitandukanye bitewe n’ibindi byaha baba bakora bakananirana abo ngo ntibyashoboka ko basubizwayo, ariko abimuwe bakuwe muri iriya Gereza igihe yashyaga bo ngo mu gihe cya vuba bazegerezwa imiryango yabo kugira ngo bajye mu buryo bworoshye.

Gereza ya Rubavu ifite abagororwa  7117 bose ni abagabo.

MAISHA Patrick
UMUSEKE.RW

Kuri uyu wa Kane Perezida Paul Kagame azaba ari i Paris mu Bufaransa mu nama mpuzamahanga ihuza abahanga mu bya Siyansi n’ikoranabuhanga yitwa Viva Technology (VivaTech).

Ni inama izaba taliki 16 -17 Gicurasi, 2019 i Paris.

Muri iyi nama kandi hatumiwemo Perezida wa Senegal Macky Sall.

Biteganyijwe ko Perezida Paul Kagame azatanga ikiganiro muri iyi nama yitabiriye ku nshuro ya kabiri.

Iyi nama itegurwa n’ikigo kitwa Publicis Groupe kiyoborwa na Maurice Lévy usanzwe ari inshuti y’u Rwanda.

Viva Technology 2019 yitabirwa n’abantu 100,500 baturutse mu bihugu 125.

Izaba irimo abahanga mu ikoranabuhanga, abafata ibyemezo bya Politiki, abashinze ibigo bikomeye bitanga serivisi zikoresha ikoranabuhanga n’abandi.

Muri bo harimo Jacky Ma washinze Alibaba, Mark Zucherberg washinze Facebook n’abandi…

Perezida Kagame yitabiriye iyi nama umwaka ushize taliki 24, Gicurasi, 2018.

Jeune Afrique

Jean Pierre NIZEYIMANA
UMUSEKE.RW

Ku nshuro ya Kane, Umujyi wa Kigali watangije ubukanguramba bwo kurwanya indwara zitandura, Umuyobozi w’Umujyi wa Kigali Rwakazina Marie Chantal n’uwa RBC, Dr.Condo Umutesi Jeanine bahuriza ku kuba izi ndwara zihenze cyane kuzivura bagasaba Abanyarwanda kwitabira kwisuzumisha kare aho kuzahendwa n’ikiguzi cyo kwivuza.

Ku Kigo Nderabuzima cya Remera mu karere ka Gasabo, niho hatangirijwe ubukangurambaga bw’iminsi irindwi, (13 – 19 Gicurasi 2019) bugamije kurwanya indwara zitandura (non-communicable diseases).

Yagize ati “Kwisuzumisha hakiri kare ni byiza kuko umuntu aba afite amahirwe yo kuzikira, izi serivisi twazegereje ku bigo ngerabuzima kuko nibwo biborohera, ngo umuturage tumusange hafi, abantu baze ari benshi.”

Umuyobozi w’Umujyi wa Kigali avuga ko izi ndwara zitandura hari abibeshya ko ari iza abakire ariko ngo ni iza buri wese kuko mu baturanyi ngo usanga hari abazirwaye kandi batari mu kiciro cy’abakize, bityo ngo umuti ni ukwisuzumisha umuntu akamenya kare ko azifite akanagirwa inama uko ahindura amafunguro no gukora imyitozo ngororamubiri kugira ngo arusheho kuramba.

Yakomeje agira ati “Turashaka umuturage mwiza, ufite ubuzima bwiza nina we utanga umusaruro  igihugu gikeneye.”

Mu bisuzumwa ni isukari iri mu mubiri, n’indwara ya Diyabete, Umuvuduko w’amaraso no gupima Ibiro ngo umuntu amenye niba ibyo apima bihwanye n’uburebure bwe hagamijwe kureba niba adafite umubyibuho ukabije.

Umuyobozi Mukuru w’Ikigo k’Igihugu cy’Ubuzima (RBC), Dr.Condo Umutesi Jeanine, yavuze ko ikigenderewe cyane ari ugushishikariza abantu kwisuzumisha, bagafata ingamba zo kwirinda kuko ikiguzi cyo kuvura izi ndwara gihenze.

Ati “Amafaranga agenda mu kuvura indwara zitandura ni menshi, icyo dukangurira Abanyarwanda ni ukwirinda, bituma umenya uko uhagaze ugafata ingamba. Hari nk’abantu baba bafite ibibazo by’umuvuduko ukabije w’amaraso, bakwisuzumisha bagafata ingamba bakongera bakamera neza.”

Avuga ko bashishikariza abantu birirwa bicaye nibura kujya bahaguruka buri minota itanu bakinanura bagakomeza akazi igihe nta mwanya bafite wundi wo gukora siporo.

Ati “Amafaranga yo kuvura izi ndwara ntayo tuzabona, icyo dusaba Abanyarwanda ni ugukumira kare kuko umuntu ashobora kuba atangiye kugira umubyibuho akagirwa inama agasubira ku murongo.”

Yasabye ababyeyi kurinda abana kumara umwanya munini bicaye kuri televiziyo, kubagaburira cyane ibiryo birimo amavuta nk’ifiriti na mayonneuse, kandi bagakoresha abana babo siporo.

Kuva muri 2016 ubu bukangurambaga bwagiye bubaho ku bufatanye bwa Minisiteri y’Ubuzima, Ikigo k’Ighugu cy’Ubuzima (RBC) ndetse n’Ikigo k’iterambere cyo mu Bubiligi kitwa Enabel.

Mu Rwanda, Ubushakashatsi bwakozwe n’Ikigo k’Igihugu cy’Ubuzima ku ndwara zitandura muri 2013  bugaragaza ko 2.8% bafite umubyibuho ukabije (obese), 14.3% bafite ibiro byinshi bitajyanye n’uko bareshya (overweight) naho 7.8% bafite ibiro biri munsi y’ibyo bakabaye bafite (underweight).

Bwagaragaje kandi ko ibibazo by’umubyibuko ukabije w’amaraso byiganje cyane hagati y’abantu bafite imyaka 35-54, muri bo abagore bakaba bagize 4.7%.

Ikindi ni uko ibibazo by’umubyibuho ukabije biri cyane mu mijyi ku kigero  cya 10.2% na 7.7% mu Mujyi wa Kigali.

Ubwo bushakashatsi bwagaragaje ko 15% basanganywe umuvuduko ukabije w’amaraso, kandi  ku bantu bari hagati y’imyaka 55 na 64 byiyongera ku kigero cya 40%.

Muri 2016 abitabiriye ubu bu bukangurambaga bwo kurwanya indwara zitandura ni 3606, muri 2017 bagera ku 2147 naho muri 2018 bari 5614.

Ku Isi, indwara zitandura nka kanseri, indwara z’Umutima na Diyabete ziri mu zihitana abantu benshi buri mwaka. Insanganyamatsiko y’ubu bukangurambaga ni: Twirinde indwara zitandura twirinda umubyibuho ukabije.

Mu mujyi wa Kigali bene izi serivise zitangwa kabiri mu kwezi, mu cyumweru cya mbere n’icya gatatu.

UMUSEKE.RW

Ishyaka riri ku Butegetsi muri Africa y’Epfo, ANC ni ryo ryatsindiye kuobora Inteko Ishinga Amategeko y’icyo gihugu, Perezida Cyril Ramaphosa yavuze ko agiye guhangana n’imigenzere mibi yaranze bamwe mu bayobozi ba ANC. Iyi nkuru yageze n’i Kigali, Perezida Paul Kagame yishimiye iyi nstinzi y’ishyaka ANC.

Kuri Twitter, Paul Kagame yanditse ati “Kuri Cyril Ramaphosa, ku bw’instinzi mwari mukwiriye. Tubifurije, ANC n’abatuye Africa y’Epfo guhirwa! Twiteguye gukomeza imikoranire ikomeye hagati y’Abaturage n’ibihugu igamije intego dusangiye y’iterambere.”

Mu ijambo yagejeje ku baturage nyuma yo gutangazwa kw’amajwi, Perezida Cyril Ramaphosa yavuze ko agiye gusukura ishyaka riri ku butegetsi rya African National Congress (ANC), agakuramo imigirire mibi kugira ngo arwanye ruswa.

Ubwo yari Johannesburg yashimiye abatoye, kandi avuga ko batanze ubutumwa bwumvikana.

Ramaphosa yavuze ko kuba mu mateka ANC yabonye amajwi make ugereranyije n’ibihe byatambutse (58%) ari ikimenyetso cy’uburakari bw’abatoye.

Yavuze ko atazahitamo abayobozi bakora baharanira kuzuza imifuka yabo.

Ishyaka ANC riri ku butegetsi kuva Nelson Mandela yatsinda amatora mu 1994, icyo gihe ingoma y’Abazungu ba gashakabuhake nibwo yahirimye.

Ubungu buhagaze nabi, ruswa n’ubushomeri bukabije bwiganje mu rubyiruko biri mu byateye ANC gutakarizwa ikizere mu matora nubwo ari yo yatsinze.

Perezida Ramaphosa yasimbujwe ku buyobozi bwa ANC uwari Perezida Jacob Zuma 2017, wegujwe atarangije manda kubera ibirego by’uruhererekane bijyanye na ruswa.

Jacob Zuma iteka yahakanye ibyo birego.

Ramaphosa yavuze ko azahangana n’ibyo bibazo byose. Ati “Tuzegera abo bantu bose bagiye bagaragaza ibitagenda neza.”

Yongeyeho ati “Twize amasomo menshi. Twumvise abaturage ba Africa y’Epfo. Twumvise ubutumwa nyabwo bw’ibyo badukeneyeho.”

UMUSEKE.RW

Mu kiganiro Nsanzabaganwa Modeste, Umuyobozi w’Ubushakashatsi ku Ndimi no kuzirengera mu Nteko Nyarwanda y’Ururirmi n’Umuco yagiranye n’Umuseke, arasobanura Indimi shami z’Ikinyarwanda n’akamaro kanini zifite ku rurimi bityo akagaragaza ko zikwiye kurengerwa, asaba abazi Ikirera cyangwa Ikigoyi kubivuga bemye batishisha ubaseka, ariko na bo bagasabwa kumenya Ikinyarwanda rusange.

Nsanzabaganwa avuga ko ari amahirwe kuba u Rwanda ruzifite Ikinyarwanda na ziriya ndimi shami zigishamikiyeho, kuko ari ubukungu bw’u Rwanda.

Yavuze ko Ikigoyi n’Ikirera, ari indimi shami nini z’Ikinyarwanda bityo ngo ni ngombwa kuzisigasira.

Ati “Ushobora kuganira n’Umuntu ntumenye ko ari Umugoyi, ariko azi Ikigoyi azi n’Ikinyarwanda mbonera, ni ugushishikariza abantu bakazandikamo nk’inkuru, inkoranyamagambo n’iyo yaba nto, bakandika ikibonezamvugo k’izo ndimi shami, abantu bakamenya ko ziriho kandi bakazishyigikira.”

Uretse ziriya ndimi shami z’Ikinyarwanda umuntu yavuga ko ari nini, hari n’izindi nto ndetse ngo zigenda zizimira, nk’Urunyagisaka (ururimi rwavugwaga mu Gisaka), Igishobyo cyangwa Urushobyo (Ururimi ruvugwa ku Nyundo) ariko rukaba rusigaye ruvugwa n’abantu bake cyane, hari n’Igisozo (Kivugwa mu gace k’u Rwanda kegereye u Burundi).

Igishobyo n’Igisozo ngo ni indimi shami mu myaka iri imbere zizaba zitakivugwa kuberako abazikoresha ari bake cyane, ariko Ikirera n’Ikigoyi ngo ni indimi zikwiye gusigasirwa.

Nsanzabaganwa Modeste ati “Kwiga ziriya ndimi bifite inyungu ikomeye. Iya mbere ni ukumenya uko Ikinyarwanda gihagaze. Iyo ufite umutungo ugomba kumenya uko uhagaze, iyo ufite ikigega ugomba kumenya uko gihagaze. Ese kiruzuye, kiracagase, nakongeramo iki? Nakuramo iki? Natwe umutungo wacu ni Ikinyarwanda, tugomba kugisesengura, tukamenya uko gihagaze.”

Inzira u Rwanda rwihaye yo ugukoresha indimi nyinshi ngo ni nziza ariko ishobora gutuma Ikinyarwanda kinjirirwa, Abanyarwanda turamutse turangaye.

Ubu indimi zemewe n’amategeko ni enye (Ikinyarwanda, Igiswahili, Icyongereza n’Igifaransa), n’izindi zishobora kuzaza ndetse na zimwe muri izi zikarekwa bitewe n’inyungu u Rwanda ruzaba rufite.

Nsanzabaganwa yagize ati “Umwe mu miti yadufasha guhangana n’ivangandimi  (mva mahanga), ni ukuzamura indimi zacu, indimi shami tukavomamo ibyo dukeneye kuruta uko tuvoma mu Cyongereza cyangwa mu Gifaransa. Urugero, byaba ari byiza kuvoma mu Rurera cyangwa Ikirera ijambo ‘indiga’, aho gutira ‘knife’ cyangwa ‘couteau’ (yose avuga icyuma)”.

Avuga ko … ari yo nzira nziza yo kwagura amarembo yo gusabana n’abandi, tugomba gukora uko dushoboye kosee ngo bidatuma Ikinyarwanda kidindira. Kuri ubu abantu benshi bagwa mu mutego wo kuvanga indimi batibajije cyane ingaruka bigira ku Kinyarwanda.

Abahanga ngo barakomeza kureba izo ndimi bashakisha amagambo batiramo aho kuyavana mu ndimi zidafite aho zihuriye n’u Rwanda.

Nsanzabaganwa Modeste ati “Biratangaza kumva umuntu avuga ngo ‘mbuze uko mbivuga mu Kinyarwanda.’ Kandi ni Umunyarwanda, aravuga Ikinyarwanda. Ati ‘iyo ubisesenguye rimwe na rimwe uramwumva, ashobora kuba atazi icyo iryo jambo rivuga  kuko ntiyagize amahirwe yo guhura na ryo, cyangwa ntiyafashijwe bihagije, ubwo tugiye dufasha abantu, nabyita kugaburira Ikinyarwanda amagambo y’Ikinyarwanda yabafasha kuruta uko bajya gutira amagambo yo hanze avangira Ikinyarwanda. Indimi shami niko kamaro kazo.”

Ikinyarwanda ngo cyagiye kibangamirwa n’ubwoba bushingiye kuri politiki. Ngo usanga abantu bakomoka ahantu aha n’aha baratinyaga kuvuga indimi z’aho bakomoka kubera ko mu buyobozi hatarimo abantu benshi bavuka iwabo, ubwo bwoba ngo bukwiye kuvaho umuntu akavuga ibisa n’umwambore we w’ururimi yakuriyemo.

Mu ngamba zikwiye gufatwa mu gusigasira ziriya ndimi shami, ngo ni uko kuri radiyo zajya zikoreshwa mu biganiro bimwe na bimwe bitambukaho.

Indi ngamba ngo ni ukwandika inkuru muri ziriya ndimi, cyangwa bakandikamo ibitabo kuko ngo gutakaza ziriya ndimi ni ugutaka ubukungu.

Aha ariko ashimangira ko buri Munyarwanda wese agomba kumenya i Kinyarwanda rusange, iki twigishamo, twandikamo amategeko, …..

Mu Rwanda hari uduce tuvugwamo indimi zivanze n’Ikinyarwanda ariko atari indimi shami zacyo, utwo ni Rusizi na Nkombo aho bavuga  Amahavu n’Amashi, izo ngo ni indimi zo hakurya kimwe n’Urukiga (Igikiga) kivugwa cyane muri Uganda.

“Umuco Dusangiye Uraturanga, ururimi rwacu rukaduhuza.”

UMUSEKE.RW

Bamwe mu babuze ababo muri Jenoside yakorewe Abatutsi bavuga ko bababazwa n’uko ubuyobozi bw’Imirenge bubatuma ikemezo cy’urukiko cy’uko bapfushije abo bashakanye ‘attestation de veuf/veuve’ kandi ibisabwa ngo ugihabwe bitari bushoboke muri Jenoside. IBUKA isaba ko amategeko nka ririya yajya ibanza kugira icyo iyatangazaho kuko akora ku buzima bw’abarokotse Jenoside yakorewe Abatutsi kandi bafite umwihariko.

Umwe muri bo witwa Mukarubayita utuye i Ntarama mu Karere ka Bugesera avuga ko yigeze kujya kwaka kiriya kemezo bakamubwira ko batakimuha atabanje kujya kubisaba mu Rukiko ngo rube arirwo rwemeza ko yapfakajwe na Jenoside.

Ati: “Umwaka ushize hari umurenge nagiyemo mu igize Bugesera nshaka ikemezo cy’uko ndi umupfakazi wa Jenoside bansaba ko njya kubibwira Urukiko kugira ngo rwemeza ko ndi we. Numvise nshitse intege ndabyihorera.”

Ubusanzwe ku bantu batarokotse Jenoside yakorewe Abatutsi bashaka ikemezo cy’uko umwe muri bo yapfuye bajya ku Murenge bagasibisha amazina y’ababo bapfuye mu gitabo k’irangamimerere.

Umunyamabanga Nshingwabikorwa w’Umurenge wa Rutunga muri Gasabo, Clarisse Uwanyirigira avuga ko umuturage aba agomba kubanza gusibisha umuntu we mu gitabo k’irangamimerere kugira ngo bitazica igenamigambi.

Ku byerekeye abacitse ku icumu rya Jenoside, na we asanga bigoye kuko uretse n’uko inyandiko zerekanaga irangamimerere ryabo zangiritse no kuba basabwa gusibisha umuntu wishwe muri Jenoside kandi hari bamwe batarashyingura ababo ngo biragoye.

Ati: “Rwose ku byerekeye abacitse ku icumu biragoye kuri iyi ngingo. Numva ariko CNLG na IBUKA bari kureba uko byazagororwa bikorohera abarokotse Jenoside kubona biriya byangombwa.”

Umunyamabanga Nshingwabikorwa wa IBUKA, Naphtal Ahishakiye avuga ko uretse kuba bihenda abarokotse kugira ngo batange igarama ry’Urukiko ngo bibafata umwanya muremure.

Mbere ngo byari byoroshye kwemeza ko runaka yarokotse Jenoside kandi abantu be yabahitanye, bikemezwa n’inzego z’ibanze na Perezida wa Ibuka, ariko ubu kuko bisaba kwemezwa n’urukiko ngo biragorana.

Ati: “Mu by’ukuri hari amategeko ajyaho harebwe inyungu rusange ariko nyuma tukazasanga azabangamira abarokotse kubera umwihariko wabo.”

Asaba ko mu gukora amategeko hajya hatumirwa inzego zitandukanye z’ubuzima bw’Abanyarwanda kugira ngo itegeko rizaze ridahutaza bamwe.

Avuga ko abarokotse Jenoside yakorewe Abatutsi amateka y’imibereho yabo yihariye, abakora amategeko ngo bagombye kujya babitekerezaho.

 

Ku Munyamategeko ngo ingingo iri mu itegeko niba ibangamye yavugururwa

Umunyamategeko, Me Benôit Kaboyi avuga ko niba hari ingingo iri mu itegeko cyangwa ibwiriza, ivuga ko ibyo kwaga ikemezo cyo gupfakara bigomba guca mu Rukiko ku Banyarwanda bose,  kandi Abarokotse Jenoside yakorewe Abatutsi bafite umwihariko, ngo yaganirwaho ikavugururwa.

Aganira na Umuseke yagize ati: “Amategeko n’amabwiriza bishyirwaho n’abantu. Bibaye ari ikibazo cyagaragaye hakorwa ubuvugizi kugira ngo iyo ngingo ikosorwe kuko amategeko arakosorwa.”

Me Kaboyi avuga ko umuryango nyarwanda usanzwe ufite uburyo ukemuramo ibibazo by’abarokotse Jenoside, ko icyo kitananirana.

Avuga ko Minisiteri y’Ubutegetsi bw’Igihugu ari yo yafata iya mbere kuko n’ubundi ari na yo ifite Ikigega FARG gifasha abarokotse Jenoside yakorewe Abatutsi batishoboye n’imibereho myiza y’abacitse ku icumu mu nshingano zayo, ikaba ibijyanye n’iryo tegeko.

Jean Pierre NIZEYIMANA
UMUSEKE.RW

Ubushinjacyaha bwasabiye indi minsi 30 yo gufungwa by’agateganyo abari abayobozi bakuru mu mutwe w’inyeshyamba zivuga ko zirwanya Leta y’u Rwanda za FDLR, Nkaka Ignace (bita La Forge Fils Bazeye) na Lt.Col Nsekanabo Jean Pierre (bita Abega Camara) bari mu rukiko, bo baburana basaba kurekurwa bakajyanwa mu kigo k’i Mutobo cyakira abari abasirikare batahuka.

Mu mpuzangano iranga imfungwa n’abagororwa,  Nkaka Ignace (La Forge Fils Bazeye) yari Umuvugizi wa FDLR na Lt.Col Nsekanabo Jean Pierre (Abega Camara) wari Umuyobozi ushinzwe Ubutasi muri uwo mutwe, bagaragaye bwa mbere bambaye uwo mwenda mu Rukiko rw’ibanze rwa Gasabo.

Inkweto ya pantufure y’umukara n’umweru, amasogisi y’umutuku n’umukara niko Nkaka Ignace yari yambaye, naho Lt.Col Nsekanabo Jean Pierre (Abega Camara) yinjiye mu Rukiko yambaye inkweto y’ingozi, n’amasogisi y’umukara. Bari bicaye bitonze bategereje abacamanza.

Saa tatu n’iminota 10 Inteko iyobowe n’Umucamanza umwe n’umwanditsi w’urukiko yinjiye mu cyumba k’iburanisha, asaba Ubushinjacyaha impamvu bwongeye kugarura bariya bagabo imbere y’urukiko.

Ubushinjachaha bwabwiye Urukiko ko Nsekanabo Jean Pierre na Nkaka Ignace kubera uburemere bw’ibyaha baregwa, birimo n’iterabwoba, hagitunganywa Dosiye yabo kugira ngo bazaburanishwe mu mizi bityo bukaba bubasabira gufungwa by’agateganyo indi minsi 30.

Nkaka Ignace bita La Forge Fils Bazeye yabwiye Urukiko ko Ubushinjacyaha bwabonye igihe gihagije cyo gukora iperereza, asaba ko bwihutisha ibisabwa akaburanishwa mu mizi.

Nsekanabo Jean Pierre na we yasabye ko iperereza ryakwihutishwa akaburanishwa mu mizi kuko nta bindi bimenyetso ubushinjacya bugikineye kuri we nk’uko yabivuze.

Me Dukeshinema Beatha uhagarariye Nsekanabo Jean Pierre  yabwiye Urukiko ko igihe ubushinjacyaha bumaranye Dosiye y’uwo yunganira gihagije kuko n’ibimenyetso ubushinjacyaha bufite bwabihawe na Nsekanabo Jean Pierre.

Yakomeje asaba urukiko ko rwasuzuma rukareba ko ubusabe bw’Ubushinjacyaha bufite ishingiro rukaba ari bwo rufata ikemezo.

Ababuranyi basabye ko ejo batazaboneka mu Rukiko kuko ngo bararwaye.

Bazeye ntiyari afite uwamwunganiye mu rukiko, ariko mu iburanisha riheruka yari yunganiwe na Me Nkuba Milton.

Umucamanza yumvise impande zombi avuga ko ikemezo cy’urukiko kizasomwa kuri uyu wa kabiri tariki 14/05/2019 saa kenda.

Iburanisha rya none ryamaze iminota 30, abaregwa basabye ko batazaba bari ku rukiko ubwo ruzaba rubasomera kubera impamvu y’uburwayi.

Baherukaga mu rukiko bahabwa iminsi 30 yo gufungwa by’agateganyo ku wa 10/04/2019.

Jean Paul NKUNDINEZA
UMUSEKE.RW

Umunyakenya witwa Samson Kimani umuyobozi wa Rubavu Forex bureau amaze ibyumweru bitatu abo yakoranaga na bo batamuca iryera, bavuga ko bakoranaga bamuzanira amafaranga y’u Rwanda akabaha amadorari kuko bari bamaranye imyaka isaga 10, kuva tariki 10.04.2019 kugeza uyu munsi ntaraboneka.

Bahamagara telefoni ye, ikoranabuhanga rikabasubiza itari mu gihugu ariko bamwe bakavuga ko hari igihe bigeze kujya bandikirana ku butumwa bugufi akababwira ko ibibazo bizakemurwa na Banki Nkuru, iki kibazo cyashyikirijwe Urwego rw’Igihugu rw’Ubugenzacyaha (RIB).

Aba baturage bakora ubucuruzi bwambukiranya umupaka batangarije Umeseke ko uyu Munyakenya witwa Samson Kimani yari amaze imyaka 10 akorera mu karere ka Ruabvu, bamwe bakaba bari baramugiriye ikizere bitewe n’uburyo bakoranaga, abandi na bo bakaba barabikaga ibimenyetso by’uko amafaranga yakuwe ku makonti yabo.

Karekezi Juvenal (izina ryahinduwe nk’uko nyiri ubwite yabidusabye) yabwiye Umuseke ko afite inzu zikodeshwa mu mujyi wa Goma, yamuzaniye amafaranga y’u Rwanda 1 892 100, kugira ngo amuhe amadori.

Ngo yamuhaye sheki ngo ayakure kuri konti ye nk’uko yari asanzwe abigenza, hanyuma yaramuhamagaye ayakeneye asanga telefoni ye itariho.

Yagize ati ”Twari tumaze igihe kinini dukorana aduha amadorari tukamuha amanyarwanda  hari abayamusigiraga ku kizere, gusa abandi bakamuha za sheki.”

Mu bizeraga uyu Munyakenya barimo Abanyekongo n’Abanyarwanda, ngo batangajwe no guhamagara telefoni ye bagasanga ntiriho, bajya kuri Biro bye by’Ivunja nabwo bakababwira ko bamaze iminsi ibiri batahagera.

Umukozi wakoranaga n’abo Banyakenya yemeza ko ba Sebuja baburiwe irengero nyuma y’iminsi itatu batagera ku kazi.

Ku bijyanye  n’abantu batwariwe amafaranga yavuze ko hagiye haza benshi mu bihe bitanduknye, harimo abavuga ko yabatwaye agera ku 20.000$ n’ari munsi yayo ariko yose hamwe twasanze agera ku $100.000.

Ati ”Hari tariki 8.4.2019 tubona azanye na mugenzi we utakundaga kuhaba we yabaga muri Kenya, umwe ahetse igikapu banyereka uburyo nzagufunga system y’akazi bukeye bwaho mbona ntibagarutse.”

Avuga ko bacuruzaga amafaranga make muri iyo minsi ibiri, ngo nimugoroba yaramuhamagaye amubwira uko akazi kari kugenda amubwira ko nta mafaranga ahari, ngo mu gihe gito abona abantu bateye ku biro bavuga ko bakeneye amafaranga yabo.

Polisi yasabye aba bambuwe kujyana ikirego cyabo mu Rwego rushinzwe Ubugenzacyaha RIB.

Bitewe n’ubucuruzi bwambukiranya umupaka bukorerwa mu karere ka Rubavu abacuruzi bagirirana icyizire cyane kijyanye n’ivunja n’ivunjisha haba ku bacuruzi bakorera mu mujyi wa Gisenyi ndetse no mujyi wa Goma.

Maisha Patrick
UMUSEKE.RW

Ku rukiko rwisumbuye rwa Gasabo haburanywe ikirego cy’ubujurire cyatanzwe n’Ubushinjacyaha busaba Urukiko gutesha agaciro ikemezo cy’Urukiko rw’Ibanze rwa Gasabo rwagize abere abari abayobozi b’Ikigo k’Igihugu cy’Uburezi (REB) baregwa kunyereza asaga miliyoni 196, rugategeka ko barekurwa.

Ubushinjacyaha buhagarariwe na Me Prudence Biraboneye bwabwiye Urukiko ko bitumvikana ukuntu Urukiko rw’Ibanze rwa Gasabo rwafashe ikemezo cyo gufungura bariya bagabo bayoboye REB, ari bo Dr John  Rutayisire, Gasana Ismail Janvier,  Harerimana Ali, Rusatsi Ngemanyi Juvenal na Bagaya Rutaha.

Bagizwe abere n’Urukiko rw’ibanze rwa Gasabo ku wa 09/04/2019 rutegeka ko barekurwa.

Yavuze ko Ubushinjacyaha bwari bwatanze ibimenyetso byose byerekana ibyaha bariya bari bafunze bakoze, ariko bikaza guteshwa agaciro n’Urukiko.

Ubushinjacyaha bwavuze ko bukurikiranyeho bariya bari abayobozi ba REB kwishyura amafaranga y’ubwishingizi butigeze bufatwa.

Gasana Janvier wari witabye Urukiko yavuze ko ibyo Ubushinjacyaha bwavuze byose nta shingiro bufite kuko imibare y’amafaranga bwakomeje gutanga ngo ari ukujijisha Urukiko, ngo nta bwishingizi bafashe bw’ibikoresho ahubwo hakodeshejwe inzu bibikwamo.

Yavuze ko nta gihombo na kimwe Leta yagize kubera we, bityo ngo mpamvu zatuma afungwa, ndetse avuga ko afite uburwayi bwemejwe na Muganga ku buryo afunzwe atakwitabwaho.

Ubushinjacyaha bwari bwabwiye Urukiko ko nta mwirondoro Gasana Janvier afite, ariko yavuze ko ari umuntu wakoze imirimo itandukanye n’ubu akaba ari Umuyobozi wungirije wa Njyanama y’Umujyi wa Kigali, ngo abaturage ntibamugirira ikizere cyo kumutora atari umuntu uzwi.

Abandi bareganwa na we ari bo Dr Rutayisire John, Harerimana Ali, na Rusatsi  Ngemanyi Juvenal na bo bahawe umwanya wo kwisobanura bose bavuga ko ikirego cy’ubujurire Ubushinjacyaha bwatanze kitahabwa agaciro kuko ngo ibyo bakoze byose byari bikurikije amategeko.

Rusatsi  Ngemanyi  Juvenal wari ushinzwe Ingengo y’Imari ya REB yasabye Umucamanza ko kumukura muri Dosiye kuko we ngo inshingano yari afite nta kemezo yafataga cyo gusohora amafranga, yari ashinzwe kureba niba ibyishyuzwa byuzuye gusa.

Dr Rutayisire John wasimbuwe na Gasana Janvier ku buyobozi bwa REB, yabwiye Umucamanza ko imashini za Laptop REB yatumije zose zageze aho zikwiye kugera.

Me Bayingana Janvier wunganira Dr Rutayisire yabwiye Urukiko ko ibyo Ubushinjacyaha busaba Urukiko bidakurikije amategeko.

Yabwiye Urukiko ko ukwezi bwasabaga ko Dr Rutayisire afungwa kwarangiye kandi iperereza bwashakaga gukora rikaba na ryo ryarakozwe ngo nta hantu ryerekana uruhare rwa Rutayisire mu gutwara amafranga yavuzwe.

Iburanisha ryamaze amasaha ane, Umucamanza avuga ko isomwa ry’urubanza kuri ubu bujurire bw’Ubushinjachaha rizaba ku wa 17/05/2019 saa kenda.

Abaregwa bakurikiranyweho kunyereza amafaranga ya Leta asaga miliyoni 196.6 byagaragaye ko yaburiwe irengero muri Raporo y’Umugenzuzi Mukuru w’imari ya Leta ya 2015.

Jean Paul NKUNDINEZA
UMUSEKE.RW

Kuri uyu wa kane ku Rukiko Rukuru hari hateganyije isomwa ry’urubanza rwa Radio Amazing Grace iheruka gufungirwa burundu ibiganiro kubera ikiganiro cyayitambutseho, Ikigo RURA kigenzura imirimo imwe n’imwe ifitiye Igihugu akamaro kikavuga ko gipfobya abagore, iyi radiyo yatsinzwe mu Rukiko Rwisumbuye rwa Nyarugenge ijuririra mu Rukiko Rukuru.

Uyu munsi Bryan Shoof washinze iyo radiyo n’abana be batanu na bamwe mu bahoze ari abakozi be bari mu rukiko bategereje imyanzuro ifatwa ku bujurire bwe.

Saa tanu n’igice ni bwo umucamanza n’umwanditsi w’Urukiko binjiye mu cyumba k’iburanisha abwira abari baje gusomerwa ko ‘system ikoreshwa mu kureba imyanzuro’ yapfuye, avuga ko urubanza ruzasomwa ku wa 28/05/2019 saa tanu z’amanywa.

Bryan Shoof yabwiye Umuseke ko nta kibazo abibonamo cyane kuba isomwa ry’urubanza rwe ryimuwe.

Uyu mugabo ukomoka muri Leta Zunze Ubumwe za Amerika aburana mu Rukiko Rwisumbuye rwa Nyarugenge ntiyigeze yishimira imikirize y’urubanza, icyo gihe yabwiye Umuseke ko yageze ku rukiko agiye gusomerwa asanga urubanza rwasomwe kera akavuga ko atigeze abimenyeshwa.

Mu mwanzuro w’Urukiko Rwisumbuye rwa Nyarugenge wasomwe tariki ya 9 Ukwakira 2018, wategekaga Radio Amazing Grace guha RURA indishyi ya Frw 500 000 kuko kuko yashoye icyo kigo mu nkiko nta mpamvu.

Uyu munyamerika yabwiye Umuseke icyo gihe ko ikemezo cyafashwe n’Urukiko ari icya poritiki.

Bryan Shoof  yahise ajuririra mu Rukiko Rukuru, akaba yaraburanye mu mizi ku wa 11/04/2019.

Mu iburana yabwiye Umucamanza ko RURA yafashe umwanzuro wo gufunga radiyo ye mu buryo budakurikije amategeko kandi ariyo yayishyiriyeho. Yasabaga indishyi ya miliyoni 100Frw.

Ikibazo cyo gusubika imanza zari busomwe kimaze iminsi kigaragara mu nkiko zo mu Rwanda, kimwe n’isubikwa ry’imanza ziba kuburanishwa Abacamanza bakavuga ko ‘System yapfuye’, ariko abanagana inkiko ntibabyishimira.

Jean Paul NKUNDINEZA
UMUSEKE.RW

Mu murenge wa Busogo, mu Karere ka Musanze, Perezida Paul Kagame yahahuriye n’abaturage akemura ibibazo byabo, mu biganiro yaraye agiranye n’abavuga rikumvikana baho, yemeye ko azubaka Ibitaro bya Ruhengeri. Mu byo yagejejweho bikibangamiye iterambere rya Musanze ni ukuba batagira ahantu ho kwidagadurira kandi ari umugi wunganira Kigali.

Umuyobozi w’Akarere ka Musanze, HABYARIMANA Jean Damascène yabwiye Umukuru w’Igihugu ko amushimira kuba yemereye abatuye Musanze kuzabubakira Ibitaro bya Musanze.

Yamubweye ariko ko Musanze ikeneye ahantu ho kwidagadurira nk’umugi wunganira Kigali, ngo ho honyine hatari ahantu nk’aho.

Minisitiri w’Ubutegetsi bw’Igihugu Prof Shyaka Anastase yavuze ko Musanze ihabwa umwihariko mu ngengo y’imari igamije iterambere, ngo aka Karere mu mwaka ushize kahawe ingengo y’imari ya Miliyari 8Frw  ikaba yarikubye 2.5 ugereranyije n’iyo babonaga mu myaka itatu ishize.

Mu ijambo Perezida Kagame yagejeje ku baturage yavuze ko yishimiye kubasura kandi azasubirayo vuba, ngo ikizamusubizayo ni ukureba niba ibibazo yasanzeyo bizaba byarakemutse, hanyuma uzabirangaramo akazamushakira umuti.

Kagame yavuze ko ibibazo bibazwa n’abaturage usanga ari ibitaburirwa igisubizo, avuga ko uruhare rwa mbere ruri ku bayobozi, ariko bidakuraho n’ubufatanye bw’abaturage.

Yagarutse ku bibazo bimwe na bimwe birimo inzu zisakaje amasakaro ya Asbestos yaciwe kuko yangiza ubuzima bw”abantu, ngo byavuzweho mu myaka 10, ariko ngo izo nzu iyo ugeze i Musange usanga zarabaye umutako.

Ati “Iyo ubabajije bavuga ko ari ‘budget’. Abayobozi dufite banyura ku bintu nka biriya ntibabibone, wababaza bati ni amafaranga… “

Perezida wa Repubulika yasabye Abantu ba Musanze, basanzwe ari abakozi kugerageza bakita ku kibazo k’isuku nke cyavuzwe hatabaye ko undi muntu aza kukibabwira.

Yavuze ko abakerarugendo bataza kureba umwanda ku buryo n’ubutaha byazababuza kuhasura.

Ati “Aka karere gateye imbere mu bukerarugendo, ni ukuvuga ko mugira abashyitsi benshi bazana amadovise, ntidukwiye kwemera ko abayazana babasanga mu mwanda kuko bataba baje kureba umwanda.”

Umukuru w’igihugu wanagarutse ku mirire mibi, yavuze ko umuti w’ibi bibazo ugomba no kuva mu bayobozi bagashishikariza abaturage kugira isuku.

Ati “Ikibazo cy’umwanda n’imirire mibi tumaze igihe kinini tubivuga kandi ntibikeneye amafaranga azava muri leta cyangwa mu baterankunga, aho biva ha mbere ni mu bayobozi.”

Ku kibazo cy’amazi ava mu Birunga ni ikindi yavuzeho, avuga ko byavuzwe kera, ariko ntihagira igikorwa yiyemeza kugikemura.

Ati “Ndumva twarabigizemo intege nke mu buryo butandukanye, harimo amikoro n’uburangare na cyo ndagihagurukira ariya mazi yakoreshwa ibindi aho kugira ngo arimbure ibyo abantu bubaka.”

 

Umutekano wacu ni umurongo utukura utagira uwurenga

Ku mutekano, yavuze ko ntacyakorwa udahari, kuko n’abo bamukerarugendo bakomeza kuza kuko mu gihugu haba hatemba amahoro n’ituze.

Yasabye abaturage gukomeza kugira uruhare mu gucunga umutekano bagahora bazirikana ko ntawe ugoma kuwutokoza ngo bimugwe amahoro.

Ati “Ntawe ugomba kurenga umurongo utukura ku bijyanjye n’umutekano wacu, ntabwo mugomba kubemerera yaba ababarimo cyangwa abaturuka hanze.”

Perezida Kagame wanakiriye ibibazo by’abaturage, yanagarutse ku kibazo k’ikaragiro ry’amata cyari cyavuzweho ejo ubwo yasuraga abaturage bo mu karere ka Burera, asaba abayobozi bo mu bigo n’inzego zirebwa na kiriya kibazo kugisobanura.

Abayobozi barimo uwo mu kigo k’Igihugu k’Iterambere RDB, uw’ikigega gitera inkunga imishinga y’urubyiruko BDF n’uwo mu kigo gikora ubushakashatsi ku iterambere ry’inganda, bose bahurije ku kuba harabayeho imicungire itanoze muri ririya karagiro bigatuma ritagera ku ntego ryashyiriweho.

Aba bayobozi bavuga ko mu gushakira umuti kiriya kibazo, bagiye kwegurira abikorera ririya kusanyirizo.

Umukuru w’igihugu yagiriye inama bariya bayobozi ko mbere yo guha ririya kusanyirizo abikorera, bagomba kubanza kumva neza umuzi wa kiriya kibazo kugira ngo n’abo bazariha bazagire aho bahera kandi bagakurikirana imikorere ya ruriya ruganda rwashyizweho mu nyungu z’aborozi.

Photos© Village Urugwiro

Martin NIYONKURU
UMUSEKE.RW

Mu ihuriro rigamije kuganira ku kibazo k’ihungabana mu rwego rwo kwibuka ku nshuro ya 25 Jenoside yakorewe Abatutsi, Mme Jeannette Kagame yavuze ko ubukana Jenoside yakoranywe bungana n’ihungabana yasigiye abayirokotse n’Abanyarwanda muri rusange.

Yagiye atanga ingero za bamwe mu batanze ubuhamya bwabo ku byo bibuka, avuga ko hari abo usanga bariciwe ababyeyi muri 1959, 1963 cyangwa mu 1973 abo ngo bagendana n’ihungabana rikomeye.

Ababyeyi bandujwe ubwandu bwa Virus itera SIDA muri Jenoside yakorewe Abatutsi na bo ngo bafite ihungabana, abana barokotse iyo Jenoside na bo bafite ihungabana, hakaba n’abandi ababyeyi bababo bakoze Jenoside cyangwa bayigiramo uruhare.

Ati “Hari uwitwa Albert Nsengimana wari ufite imyaka 7 muri Jenoside, agendana ihungabana kuko nyina yatanze bene Se barimo na we ngo bicwe, yanditse igitabo ‘Mama Yaranyishe’.”

Undi witwa Muhamed Butera, ngo afite imyaka 7 muri Jenoside yakorewe Abatutsi, Se yamufataga akaboko akajya kwica abantu, ngo iyo umubajije icyo amwibukiraho avuga ko amwibuka atema abantu.

Ati “Ni igikomere kwibuka umubyeyi wawe umwibukira ku nabi yagiriye abantu.”

Yavuze ko guhangana n’iryo hungabana ry’abo yatanzeho urugero n’iry’abandi muri rusange bisaba kumva neza umwihariko w’amateka y’u Rwanda.

Yashimye abitanze bakabohora igihugu n’imiryango igira uruhare mu guhangana n’ihungabana.

Mme Jeannette Kagame yavuze ko abagiye bandika ibitabo ku bijyanye n’ihungabana batari Abanyarwanda bahereye mu biri mu mico yabo n’inzira banyuzemo, ariko ngo hakwiye no gukorwa ubushakashatsi kugira ngo uburyo u Rwanda rwita ku ihungabana na bwo byigirweho ku rwego mpuzamahanga.

Ngo abize iby’ihungabana bagera ku 2000, ni intambwe ikomeye yafasha guhangana na ryo bikozwe n’abanyamwuga, akaba yavuze ko bariya bantu bashyirwa ahahurirwa abantu benshi uwahungabanye akitabwaho n’ababyigiye.

Yavuze ko nk’uko nta we uhagarika urugamba rwo kwibohora nta n’uhagarika urugamba rwo gukira ibikomere afite. Ngo muri gahunda y’iterambere (NST), abikorera bahawe umwanya ukomeye, bityo abize ihungabana yabasabye gushinga ibigo byabo byajya bifasha abahungabanye.

Dr Bizimana Jean Damascene, Umunyamabanga Nshingwabikorwa wa Komisiyo y’Igihugu yo kurwanya Jenoside (CNLG) avuga ko ubushakashatsi bwagaragaje ko ihungabana rihererekanywa mu miryango, rikava ku bana barokotse Jenoside barifite bakazariha n’abazabakomokaho.

Yavuze ko ubushakashatsi bwakozwe mu 1995 na UNUCEF ku bana bari barokotse Jenoside yakorewe Abatutsi muri Perefegitura zose, basanze 21% bafite ibimenyetso by’ihungabana, naho ubwakozwe muri 2001 ku bagizwe abapfakazi na Jenoside yakorewe Abatutsi, ngo 41% bari bafite ihungabana.

Umunyamabanga Nshingwabikorwa wa Komisiyo y’Igihugu yo Kurwanya Jenoside (CNLG) avuga ko kuba Leta yarubatse inzibutso za Jenoside yakorewe Abatutsi, bakabasha kwibuka ababo bishwe no kuvuga akarengane bagiriwe ari rumwe mu nkingo z’ihungabana.

Yavuze ko ubushakashatsi bwakozwe mu Ukuboza 2018, bwagaragaje ko abagera kuri 28% mu barokotse Jenoside yakorewe Abatutsi bafite ibimenyetso by’ihungabana, muri bo 35% ngo bafite agahinda gahoraho gatuma bumva badashimishijwe n’ubuzima babamo, Intara y’Iburasirazuba n’Amajyepfo ngo nizo zifite imibare iri hejuru.

Ubushakashatsi bukagaragaza ko umuntu umwe kuri batanu mu barokotse Jenoside yakorewe Abatutsi ari we ugana inzego z’ubuvuzi zamufasha ku bijyanye n’ihungabana, Dr Bizimana akavuga ko iyi nama ikwiye gutanga ibisubizo kuri ibyo bibazo.

Josiane UWANYIRIGIRA
UMUSEKE.RW

*Bamwe mu baturwanya barizana, abandi aho bari hose turabazana, n’abataraza ni igihe kitaragera,
*Abayobozi badakora ibiri mu nshingano zabo bage kureba ibindi bakora.

Imbaga y’Abanyarwanda bavuye hirya no hino muri Burera bakiriye Perezida Paul Kagame, uri mu ruzinduko rw’iminsi itatu mu Ntara y’Amajyaruguru n’iy’Iburengerazuba, mu ijambo yabagejejeho yagarutse ku mutekano w’igihugu n’umubano wacyo n’abaturanyi, atanga gasopo ku bagamije guhungabanya umutekano w’u Rwanda.

Yavuze ko abayobozi bagomba gukora mu nyungu zo gukemura ibibazo by’abaturage, akaba yanenze cyane uko abaturage bava mu Rwanda bakajya gushakira serivise hanze yarwo.

Paul Kagame yamaze umwanya avuga ku mutekano w’igihugu asaba abaturage kuwugiramo uruhare ngo uboneke.

Ati “Igihu mureba cy’u Rwanda ni icyanyu, Abanyarwanda mugomba kucyubaka mukakirinda, ntabwo turi abacakara b’abaturanyi, ntabwo duhindirwaho.”

Yavuze ko Umutekano w’u Rwanda ugomba kuboneka haba ku neza cyangwa ku zindi nzira.

Yagize ati “Umutekano ugomba kuboneka ku neza bishingiye ko twumva ko ari ngombwa hagati yacu nk’Abanyarwanda no ku bandi duturanye. 

Umutekano niwo twifuza turaza kuwukorera ku neza nibiba ngombwa no ku bundi buryo niko byagenda, Ntabwo twakwingingira umuntu kuduha umutekano, arawuduha byanze bikunze, ndavuga abaturimo n’abo hanze.”

Mu mvugo isa n’ijimije ariko yumvikana kuri bamwe mu Bayobozi ba FDLR baherutse gutahuka abandi bagafatirwa ku mupaka wa Congo na Uganda, bakazanwa mu Rwanda, ubu bakaba bari kuburanishwa n’inkiko ku byaha bakekwaho, ndetse na Callixte Sankara wiyise Major Sankara uheruka gufatirwa mu birwa bya Comoros akoherezwa mu Rwanda.

Perezida Kagame yavuze ko ntawe uhungabanya u Rwanda rudashobora kugeraho aho yaba ari hose.

Ati “Bariya mwirirwa mwumva bavugira kuri internet, waba uri muri America, South Afurika, cyangwa mu Bufaransa, bibwirako bari kure, ariko koko bari kure kuko bategereye umuriro. Umunsi begereye umuriro uzabotsa. Ibyo bari bakwiriye kuba babizi, bo n’ababashyigikiye.”

Yaburiye ababashyigikiye, kumva ko u Rwanda atari ahantu baza gukinira, asaba abaturage kubwira abashaka kubashuka ko umuriro uzabotsa.

Ati “Hano ntabwo bahakinira. Umuntu akwiye kuba yumva ko twabuze umutekano igihe kinini, dutakaza byinshi ariko icyo gihe cyarahise. Turashaka amahoro ku neza cyangwa ku bundi buryo.”

Umukuru w’igihugu kandi yavuze ku bihugu by’ibituranyi by’u Rwanda bimaze iminsi birubaniye nabi birimo n’ibicumbikiye abashaka guhungabanya umutekano warwo bikanagirira nabi Abanyarwanda babigenderera.

Avuga ko ibyo bihugu rimwe na rimwe biba bishaka gupyinagaza u Rwanda birufata nk’insina ngufi ariko ko ubuyobozi n’Abanyarwanda badakwiye kubemerera ahubwo ko bakwiye guhora barangamiye icyabateza imbere.

Ati “Abaturanyi bashaka kuduteza ibibazo mubihorere twe dukemure ibibazo byacu, igihe bazumvira ko tugomba kubana neza, tuzabana neza. twe tubana n’abantu bose ariko ntabwo waduhindura akarima kawe uhingamo ibyo ushaka, natwe dufite ibyo dushaka.”

Perezida Kagame yanenze cyane Abayobozi bibera mu migi, bakibera mu mirwa mikuru bakumva ko isi itangirira aho ikarangirira aho, abibutsa ko hari Butaro, hari n’utundi Turere bagomba kwita ku bibazo bihari.

Yagarutse no ku baturage bacyambuka imipaka bakajya gushakira serivisi mu bindi bihugu, avuga ko bajyayo kuko hari abayobozi batujuje inshingano zabo ngo ziriya serivisi zisakazwe mu bice by’igihugu cyabo

Ati “Ibyo mujya gushaka hanze y’imipaka ibyinshi biri hano n’amasoko ari hano, ariko abayobozi baragenda bakibera mu migi bakagira ngo Isi ni ho irangirira, oya, ntabwo ariho Isi irangirira, hari Butaro, hari Burera, hari ahandi.

Iki gihugu cy’u Rwanda, ni igihugu cyacu tugomba kubaka tukakirinda, tukarinda ibyo twubaka ntabwo turi abacakara babaturanyi, ntabwo turi insina ngufi.”

 

Mwe abaturage nta kibazo mufite iyo muyobowe neza mukora neza

Perezida Kagame wabwiraga abaturage ko aza no kugirana ikiganiro kihariye n’abayobozi, yavuze ko hari ibyo badakora kandi ubushobozi bwabyo buhari.

Ngo ibi kandi bituma abaturage bajya gushaka serivisi mu baturanyi bakomeza kwiyongera rimwe na rimwe bagerayo ntibafatwe neza.

Ati “Abana bava mu mashuri bambuka imipaka bakajya kwivuza ahandi kandi uburyo bwo gukemura ikibazo buhari, bakambuka imipaka bajya gushaka ibintu bakwiriye kuba babona hano kandi ubushobozi buhari.”

Avuga umuti w’ibi “nta handi byahera bitari ku bayobozi bagakorana n’abo bakorana bigakemuka, hari abayobozi benshi bicaye hano baraza kubibazwa ndetse baraza no kubisubiza.

Ntabwo dufite ubushobozi bwo gukora byose ariko burahari buhagije bwo kuduha ku kigereranyo gihari ibyo twifuza uko bingana.”

Yavuze ko bitumvikana kuba hari abana bagisiba ishuri kandi hari abayobozi bakwiye kuba bakemura icyo kibazo ahanini kiba gishingiye ku barimu na bo batuzuza inshingano zabo.

Yanagarutse ku kibazo cyari cyagaragajwe n’Umuyobozi w’aka karere cyo kutabasha kugira uburyo bwo gukurikirana ibibera ku Isi kuko nta minara y’ikoranabuhanga ihari.

Avuga ko na bwo gifite imizi ku bayobozi batagiha agaciro nyamara bituma abanyarwanda batamenya iby’iwabo ahubwo bagakurikirana ibyo mu baturanyi.

Ati “Mwebwe abaturage nta kibazo mufite, iyo muyobowe neza mukora neza, haba intege nke mu buyobozi byinshi twagombaga kugeraho ntitubigereho.”

Ikibazo k’imbuto z’ibihingwa by’umwihariko ibirayi gikunze kugarukwaho n’abaturage henshi umukuru w’igihugu yabasuye, uyu munsi yavuze ko cyari gikwiye kuba cyarakemuwe n’inzego zibishinzwe.

Martin NIYONKURU 
UMUSEKE.RW

Umugore wo mu murenge wa Bugeshi mu karere ka Rubavu, avuga ko yakubiswe n’umuturage baturanye w’umucuruzi amutera uruguma ku jisho kuva byaba ntarabona abo aregera, arashinja Abapolisi bakorera hafi y’aho atuye gukingira ikibaba uwamuhohoteye.

Nyirazanazose Angelique yakubiswe ku cyumweru, ikigo Nderabuzima cy’aho atuye bamuha urwandiko rwo kujya kwivuza ku Bitaro bya Gisenyi ngo barebe ko ijisho rye ryaba ari rizima, cyangwa ritaramenwe n’imigeri yakubiswe.

Yaganiriye n’Umuseke kuri telefoni ari kwa muganga.

Ati “Umugabo namugurije Frw 10 000, ku cyumweru arambwira ngo ngende ayampe musange kuri Santire, aho kunyishyura yangiriye nabi, arankubita, imigeri yo mu maso, mu mutwe hari n’iryinyo ryacitse.”

Uyu mugore atuye mu mudugudu wa Gasizi, mu Kagari ka Hehu, mu murenge wa Bugeshi ni naho yakubitiwe.

Ni umugore wibana, ngo umwana we w’imfura afite imyaka 14 naho umuto afite imyaka ibiri, akaba asaba kurenganirwa kugira ngo abone uko yita ku bana be.

Avuga ko uwamukubise yitwa Epimaque Nzamuye ucuruza ibirayi, akaba akingirwa ikibaba na bamwe mu Bapolisi baziranye barimo uwitwa Afande Honore.

Uyu ngo yagiye kumuregera amubwira ko abanza kujya kwivuza, undi ajya kuregera kuri Polisi ya Busasamana, na bo baramwirengagiza.

CIP Gasasira uvugira Police mu Ntara y’Iburengerazuba yabwiye Umuseke ko bibaye byarabaye uwo mucuruzi akambura amafaranga uriya mubyeyi akanamukubita, ngo yagombye kuba yaragejeje ikirego ku Rwego rushinzwe Ubugenzacyaha (RIB) i Rubavu kuko gukubita no gukomeretsa ari ibyaha bigenzwa na RIB.

Daniel Gasana, Umunyamabanga Nshingwabikorwa w’Akagari ka Hehu yabwiye Umuseke ko ‘kubera ko ibyabaye ari icyaha cyo gukubita no gukomeretsa ngo ubuyobozi bwacyohereje kuri Police’ ngo bategereje imyanzuro izavamo.

Yavuze ko yaba uwakubiswe n’uwamukubise bombi bitabye Komanda wa Polisi ya Bugeshi, ariko nyuma ngo barataha, n’ubu uwakubise ari iwe.

 

Icyo amategeko abivugaho:

Ingingo ya 148 mu Gitabo kigena ibyaha n’ibihano ivuga  ‘Gukomeretsa ku bushake ku buryo bubabaje’

Umuntu wese ubishaka, ukomeretsa undi cyangwa umukubita cyangwa umusagarira ku buryo bwa kiboko bubabaje, ahanishwa igifungo kuva ku mezi atandatu (6) kugeza ku myaka ibiri (2) n‟ihazabu y‟amafaranga y‟u Rwanda kuva ku bihumbi ijana (100.000) kugeza ku bihumbi magana atanu (500.000) cyangwa kimwe gusa muri ibyo bihano.

Mu gihe umugambi cyangwa igico byateguriye icyaha, uwakoze icyaha ahanishwa igifungo kuva ku myaka ibiri (2) kugeza ku myaka itatu (3) n‟ihazabu y‟amafaranga y‟u Rwanda kuva ku bihumbi ijana (100.000) kugeza ku bihumbi magana atanu (500.000).

UMUSEKE.RW

Mu kiganiro yahaye abitabiriye gahunda y’ibikorwa by’ubukangurambaga bujyanye n’icyumweru cyahariwe abagenda mu muhanda, Umuyobozi wa Polisi wungirije, DIGP Felix Namuhoranye yavuze ko abatanga ruswa ngo babone ibyangombwa byo gutwara ibinyabiziga cyangwa iby’ubuziranenge bw’ibinyabiziga kandi batujuje ibisabwa nta handi baba baganisha uretse ku mpanuka.

Yavuze ko abantu bakwiye kuba ijisho ry’abo bakoresha nabi umuhanda n’abatanga ruswa kuko ngo yaba uyitanze n’uyakiriye baba banganya icyaha, kandi ngo ya mpanuka iyo ije ntirobanura ngo ikuremo abafitanye isano n’abo bakoze ayo mafuti.

DIGP Felix Namuhoranye ati “Turirinda impanuka muri rusange ariko twemeranye ko ruswa yo mu muhanda itera impanuka. Iyo uhaye ruswa ushinzwe kuguha ikemezo cy’ubuziranenge bw’ikinyabiziga, nubwo mwembi mufite ibyaha bingana, ariko uyifashe ari uriya Mupolisi ugiye kuyiguha utayikwiye, cyangwa akayiguhera igiciro gitandukanye n’igisabwa n’ikigenwe, ntaho atandukaniye nawe uyimuhaye.”

Umuyobozi wa Polisi y’Igihugu wungirije yavuze ko kubera guhabwa icyangombwa k’uko imodoka yujuje ubuziranenge kandi atari byo, ngo bizatuma ya modoka ikora impanuka ihitane ubuzima bw’abantu batagize uruhare muri ruswa abo bantu batanze cyangwa bakiriye.

Mu mwaka ushize ngo Police y’igihugu yirukanye Abapolisi 77 bo mu Ishami rishinzwe umutekano wo mu muhanda bazira ruswa, naho abashobori 160 bafunzwe kubera icyo cyaha.

Ati “Wakwibaza ngo Umupolisi umwe ahabwa ruswa n’abantu bangahe kugira ngo mu birukanywe 77 hafatwe abashobori 160. Icyo bivuze ni uko Umupolisi twafashe rimwe na rimwe tumufata yakiriye ruswa y’abantu barenze umwe.”

DIGP Felix Namuhoranye yavuze ko umwaka ushize  wa 2018 impanuka zahitanye abantu 465 zikomeretsa abasaga 654.

Mu ngamba Polisi y’Igihugu ifite mu kugabanya ayo makosa n’ibyaha bibera mu muhanda, ni ubukangurambaga buzamara ibyumweru 52 bigamije kugabanya impanuka kuko ngo mu cyumweru kimwe iyo hakozwe ubukangurambaga impanuka zigabanukaho 40% karenga.

Indi nzira ngo ni iyo gukoresha ikoranabuhanga haba mu gutanga ibyangombwa bijyana no gutwara ibinyabiziga n’ibya Control technique, ndetse ngo ibinyabiziga bizashyirwaho ikoranabuhanga rya GPS kugira ngo amakuru ajye amenyekana vuba, ikindi ngo Polisi izashyira camera ahantu henshi hashoboka.

Umunyamabanga wa Leta muri Minisiteri y’Ibikorwa Remezo ushinzwe gutwara abantu n’ibintu, Eng. Jean Dieu Uwihanganye yabwiye itangazamakuru ko imibare yerekana ko u Rwanda ruri mu bihugu bigira impanuka nyinshi.

Yavuze ko impanuka ku Isi zihitana abantu miliyoni 1,2 hagendewe ku mibare ya OMS yo muri 2015, avuga ko u Rwanda rwafashe ingamba zo gufatanya kugira ngo impanuka zigabanuke.

Muri zo harimo kubaka imihanda ifite ubugari buhagije, gushyira ikoranabuhanga ngabanyamuvuduko mu binyabiziga n’iryo koranabuhanga rya GPS rizatangira gushyirwa muri moto zose muri Nyakanga 2019.

Ati “Hafi buri munsi iyo tubara dusanga dutakaza umuntu buri munsi, batatu baba bakomerekeye muri izo mpanuka, mu bantu bagera mu 1000 yaba akomereka n’abazira impanuka, 80% ziterwa n’imyitwarire y’abatwara ibinyabiziga.”

Yavuze ko ibinyabiziga bica ku bindi bitubahirije amategeko biri mu bitera impanuka nyinshi, abagenda nabi mu muhanda n’abtubahiriza amatara ayobora imodoka n’ibindi binyabiziga, ngo ibyo byose icyo bisaba ni uko abantu bahindura imyumvire n’imyitwarire yabo.

Ibi biganiro by’ubukangurambaga byabereye kuri Petit Stade, i Remera.

Jean Paul Nkundineza
Umuseke.rw

Umunyamakuru Byansi Samuel Baker avuga ko yahunze igihugu nyuma y’uko abantu yita ko “bari bagamije kumugirira nabi” bari bamaze iminsi bamukurikirana haba iwe no kwa mukuru we, ngo hari inkuru icukumbuye yakoraga kuri bamwe mu bayobora Polisi mu Turere twa Nyagatare na Gicumbi ijyanye no kwinjiza ibiyobyabwenge. Ubuyobozi bw’Ikinyamakuru The Chronicles bushidikanya ku byo avuga ko yahunze, bukavuga ko bwari bwaramuhagaritse ngo yisubireho ku myitwarire idahwitse.

Byansi yakoreraga The Chronicles mu Rwanda, yanakoze mu bitangazamakuru nka Africa News na TV 5 Monde, New Vision Uganda, Rwanda Inspirer, Bwiza.com, TV na Radio 10, ndetse akaba yarimenyereje umwuga kuri Televiziyo y’u Rwanda.

Yatangarije Umuseke ko aho yabaga i Remera haje abantu babaza mugenzi we niba ahari, undi ababwira ko Byansi adahari yimutse, abo bantu bajya kwa mukuru we utuye i Kanombe bamubajije ababwira ko yimukiye Sonatubes (Kicukiro) naho barahagera bahasanga mugenzi we babanaga, na we bamubajije abasubiza ko atazi aho yagiye.

Icyo gihe ngo yari yaraye i Huye. Uyu munyamakuru babanaga yaramuhamagaye arabimubwira. Icyamuteye amakenga ngo ni uko abo bagabo babiri babazwaga icyo bamushakira ntibakivuge.

Byansi yadutangarije ko ubu uri muri kimwe mu bihugu by’i Burayi. Nyuma ngo yaje kubona amakuru ayahawe n’umwe mu bakora muri rumwe mu Nzego za Leta bahuriye ahantu, amuha agapapuro kanditseho amagambo akomeye yo kumuburira.

Ati  “Agapapuro kari kanditseho mu Cyongereza ngo: “You have a serious danger”. If you have a way out, leave for the safety of your life (Mu Kinyarwanda bivuze ‘Wugarijwe n’ibyago. Niba ufite aho wajya, jyenda ku bwo gukiza ubuzima bwawe).”

Uwo wo muntu wamumeneye ibanga, yahise yigendera Byansi ngo agerageje kumuhamagara na telefoni undi aramukupa.

Nyuma y’icyumweru, Byansi ngo yaje guhura n’undi muntu ukora mu nzego z’umutekano, amubwira ko ashinjwa kugumura abaturage, kwangisha abaturage Leta, no Gukoresha nabi imbuga nkoranyambaga ze kandi ko bishobora kuzamuteza ikibazo gikomeye mu minsi iri imbere.

Ati “Ntiyambwiye byinshi ariko byahise bimpa umurongo.”

Byansi avuga ko yasubiye ku kazi ubuyobozi bwa The Chronicles bumuhagarika by’agateganyo  butamubwiye impamvu. Avuga ko yahagaritswe n’umwe mu Banditsi Bakuru b’icyo gitangazamakuru, ndetse abwirwa ko nta burenganzira bwo kugira icyo abibazaho afite.

Byansi Baker avuga ko yasanze impamvu nkuru itumye ashyirwaho iterabwoba, akanahagarikwa mu kazi ari inkuru icukumbuye yakoraga ku ruhare bamwe mu bayobozi ba Polisi mu turere twa Nyagatare na Gicumbi baba bagira mu kwinjiza kanyanga mu Rwanda iturutse muri Uganda.

Yabwiye Umuseke ko hari ibimenyetso bifatika yari afite kuri iyo nkuru ye.

Ubuyobozi bw’Ishyirahamwe ry’Abanyamakuru mu Rwanda (ARJ) buherutse guha abanyamakuru amafaranga yo gukora inkuru zicukumbuye. Byansi Baker na we ari mu bayahawe ayakoresha mu gucukumbura iriya nkuru.

Avuga ko hari umuntu wamuhamagaye amwihanangiriza ko agomba kuzibukira iyo nkuru.

Ati “Uwo muntu yarambwiye ngo iyo nkuru nyireke niba nshaka amahoro kuko aho mba ahazi, ibindi bazabihera aho ngaho.”

Avuga ko nyuma yatangiye kumva ubwoba muri we kandi umuyobozi wa ARJ (Association Rwandaise des Journalistes) Gonzague Muganwa ntiyari mu Rwanda ngo amugezeho ikibazo ke.

Nyuma y’iminsi mbere y’uko Byansi ahunga, wa muntu wamuhamagaye amusaba kureka inkuru ye, yongeye kuhamagara amusaba na none kuyireka.

Icyaje kumukura umutima kurushaho ngo aho yabikaga amakuru (external disc) yariho n’amakuru yakusanyije kuri iriya nkuru icukumbuye yaje kuyibura, abaza abo babana bose bavuga ko nta we uzi uko yabuze.

Byansi Samuel Baker avuga ko ari umunyamakuru wigenga wakoreye ibinyamakuru bitandukanye bikorera mu Rwanda.

Icyo ubuyobozi bw’Ikinyamakuru The Chronicles buvuga kuri Byansi

Fred Mwasa Umwanditsi Mukuru w’iki gitangazamakuru, avuga ko badaheruka kuvugana na Byansi kuva bamuhagarika mu kazi tariki ya 8 Mata 2019.

Ati “Twamuhagaritse kubera imyitwarire itari myiza tumubwira kwikosora nyuma akazagaruka agakora akazi. Hashize nk’ibyumweru.”

Mwasa avuga ko hari hashize iminsi ‘bihanangiriza Byansi’. Ati “Ameze nk’umwana usimbuka atazi aho ajya. Twagerageje kumugira inama kuko twabonaga ari umwana.”

Ku bijyanye n’uko yaba yarahunze, Mwasa abyumvise, yabaye nk’ubiseka, avuga ko Byansi yasaga n’ushaka kwishyira mu bintu bimugaragaza nk’aho umutekano we utameze neza mu gihugu.

Avuga ko inkuru icukumbuye avuga, ijyanye n’inkunga ya ARJ, ariko ngo nta kintu yari yakayikozeho cyatuma umutekano we ujya mu bibazo ku buryo yahunga.

Ati “Yashakaga ikintu cyamushyira mu bibazo nk’ibyo arimo. Iyo nkuru yashakaga ko tuzaba ari twe tuyisohora ariko nta kintu na kimwe yari bwakayikoreho.”

UMUSEKE.RW

Ingoro y’Inteko ishinga amategeko y’u Rwanda, irazwi cyane mu mateka y’Urugamba rwo kubohora igihugu. Ni hamwe muhabaye isibanuro hagati y’ingabo 600 zari iza FPR-Inkotanyi n’ingabo za Leta ya Habyarimana Juvenal. Ku nkuta zayo hariho ibimenyetso by’amasasu yayirashweo ndetse hari umwe mu ngabo za Ex-FAR wavuze uburyo yaharasaga ibisasu biremereye. Bamwe babwiye Umuseke ko gusiga irangi rishya iriya nzu hari amateka yayo bizibagiza.

Umwe mu bazi neza amateka yabereye muri iriya nzu mu rugamba rusa n’urwa nyuma rwo gufata umujyi wa Kigali ku ngabo zari iza APR-Inkotanyi, bagatsinda izari Inzirabwoba za Habyarimana Juvenal, yadutangarije ko yumva gusiga irangi rishya Ingoro y’Inteko ishinga amategeko bizatuma itakaza isura yerekaga abayihiseho bose, ibimenyetso by’urugamba rwayibereyemo.

Uyu utashatse ko amazina ye atangazwa avuga ko iyo aza kuba mu bafata ikemezo yategeka ko hubakwa indi Ngoro y’Inteko ahandi hantu, iriya nzu yahoze yitwa CND (Conseil National pour le Dévelopement) ikaguma uko imeze.

Ati: “Uwari kumpa ububasha bwo gufata ikemezo ku nzu nk’iriya njye mba narubatse indi ‘Parliament’ ahandi maze iriya nzu yose igahinduka ‘Musée Nationale du Patriotisme’ n’amarangi yayo yari ifite kirya gihe akazagumaho iteka asa kuriya, nkajya nyisiga ariya asa kuriya ibihe byose!”

Asanga gusiga irangi Ingoro y’Inteko ishinga amategeko bizatuma abakiri bato bayibona nk’izindi nzu isanzwe kandi ari inzu ifite amateka yihariye mu Mujyi wa Kigali.

Undi na we uba mu muryango w’urubyiruko ugizwe n’abavutse mbere na nyuma ya Jenoside yakorewe Abatutsi, asanga gusiga irangi rishya Ingoro y’Inteko hari ingaruka bizagira ku mateka yayo.

Ati: “Umurage w’amateka ni kimwe mu bimenyetso byerekana ibyabayeho mu bihe byahise, kikigirwaho n’abatarabibonesheje amaso yabo. Inzu nk’iriya y’Inteko irimo amateka abumbatiye ukwibohora kw’Abanyarwaanda siniyumvisha ukuntu abantu batekereza gusibanganya ibimenyetso nka biriya bitwubaka twe abato …”

Avuga ko kubwira umuntu ukiri muto ko ahantu runaka hahinduriwe ibirango kandi kera hasaga ukundi kubimwumvisha bimugora.

Uyu asaba ko ikemezo cyo gusiga irangi rishya Ingoro y’Inteko cyasubirwamo ababifitiye ububasha bagasaba ko iguma uko iri.

Umuyobozi w’ishami rishinzwe itanamaho n’iyegera ry’abaturage mu Nteko ishinga amategeko y’u Rwanda Cleophas Nzeyimana yabwiye Umuseke ko bari gusiga irangi Ingoro y’Inteko ishinga amategeko mu rwego rwo kuyisukura.

Ati: “Abantu bumve ko turi gusukura ingoro y’Inteko ishinga amategeko ariko tutazasibanganya ibyaranze amateka y’urugamba rwahabereye. Amateka azagaragarira buri wese uzasura iyi ngoro.”

Avuga ko gusiga inzu irangi nta kibazo kirimo kuko ari ibisanzwe. Yemeza ko ingoro yose izasigwa irangi ryera ikavururwa kugira ngo irusheho kugaragara neza.

Ku ya 13 Ukuboza, Perezida Paul Kagame yatashye ku mugaragaro Ingoro y’Umurage y’Amateka yo Guhagarika Jenoside, (Campaign Against Genocide Museum).

Mu gitabo cy’abashyitsi yanditsemo ati “The affection of this part of our country’s History is done very well. Thanks to those behind the work.”

Ingoro y’Inteko Ishinga Amategeko y’u Rwanda yatangiye kubakwa mu 1980, yuzura mu 1989.

Jean Pierre NIZEYIMANA
UMUSEKE.RW

Minisiteri y’Ubuhinzi n’Ubworozi yatangaje ko mu turere twa Nyabihu, Rubavu, Musanze na Burera ariho hazatangirizwa umushinga ugamije kureba ifumbire iberanye n’ubutaka mbere yo kubanza kubupima hakamenyekana ibibugize n’ibyo bukeneye. Nyuma abahinzi babishaka mu Rwanda bazajya bapimisha ubutaka bwabo bagure ifumbire hafi yabo bazamure umusaruro 

Mu mushinga witwa ‘Caravan Project for a resilient agriculture’, hazakoreshwa imodoka na moto zifite ibikoresho by’ikorabuhanga mu gupima ubutaka no kumenya ibibugize n’ibyo bukeneye ngo bwere kurushaho.

Ambasaderi  wa Maroc mu Rwanda, Youssef Imani yavuze ko uriya mushinga uzakorwa  mu rwego rwo kubahiriza ibyo Umwami wa Maroc Mohammed VI yasinyanye na Perezida Paul Kagame ubwo aheruka mu Rwanda.

Yavuze ko Maroc iteganya  gutangiza uruganda rukora ifumbire kandi ngo ruzatangira vuba kuko ibintu byose biri ku murongo.

Minisitiri w’ubuhinzi n’ubworozi, Dr Geraldine Mukeshimana yavuze ko abaturage bo muri Nyabihu na Rubavu bazapimirwa ubutaka ku buntu.

Avuga ko muri turiya turere byahatangirijwe kubera ko ari ahantu basanzwe bakenera ifumbire nyinshi kuko bahinga ibirayi byinshi.

N’ubwo muri turiya turere hasanzwe hera kubera ubutaka bwegereye ibirunga, hari ikibazo cy’uko ubutaka bwera bwahungabanyijwe n’isuri kubera ubuhaname bw’aho.

Dr Mukeshimana avuga ko uriya mushinga uje wunganira gahunda yo gupimisha ubutaka isanzwe iriho ariko ngo kuko izakoresha ikoranabuhanga ryo kwegereza abahinzi aho bapimishiriza bizabafasha kutavunika.

Ubutaka buzatangirizwaho uriya mushinga bungana na hegitari 50 000.

Jean Pierre NIZEYIMANA
UMUSEKE.RW

Mu murenge wa Nyagatare mu Karere ka Nyagatare ho mu Ntara y’Iburasirazuba hatangiye umwiherero w’iminsi ibiri w’abakozi ba Minisiteri y’Ubutabera n’inzego ziyishamikiyeho, intego ngo ni ukwisuzuma mu mikorere yabo bakarushaho gukora ariko bibanda cyane ku gukorera umuturage.

Perezida w’Urukiko rw’Ikirenge, Prof. Sam Rugege atangiza umwiherero yavuze ko hari bamwe mu Bacamanza badakora akazi kabo uko bikwiye, ibyo byose ngo bazabivuga mu mwiherero bamenye n’impamvu ibibatera.

Mu mwiherero w’iminsi ibiri w’abakozi ba Ministeri y’Ubutabera n’ibigo biyishamikiyeho, bazareba n’ibindi bitagenda mu Butabera birusheho gukosorwa nk’uko byavuzwe na Prof. Sam Rugege.

Ati “Impamvu tuza hano ni ukugira ngo dusangire ibitekerezo, ibyo twakoze neza tubyishimire ibitaragenze neza tubishakire ibisubizo. Ku bitabiriye iyi nama ni ukuvugisha ukuri mu nzego barimo.”

Prof. Rugege akomeza avuga ko hari zimwe mu manza bagenda bahura na zo zicibwa nabi akibaza niba Abacamanza babikora nkana cyangwa ari ubumenyi buke, ariko ngo impamvu nyayo bazava I Nyagatare bayimenye.

Ati “Imanza nyinshi ni izicibwa neza, duca izigera ku bihumbi maganarindwi (700,000) mu mwaka, inyinshi zigenda neza ariko hakaba nkeya zivamo zidasobanutse aho tukaba twibaza niba biterwa n’akazi kenshi nk’uko bamwe babivuga cyangwa biterwa n’uburangare, imyumvire idasobanutse cyangwa bikanaterwa n’imikorere mibi muri rusange, tukaba byose tuzava hano tumenye ikibitera kugira ngo gikosoke.”

Mu manza zakirwa ku mwaka nibura ngo 94% zicibwa neza ariko aka 6% zisigaye zicibwa mu buryo butanozwe.

Uyu mwiherero wa Ministeri y’Ubutareba ufite insanganyamatsiko igira iti “Imiyoborere myiza n’ubutabera, twongere uruhare rw’abaturage muri service z’Ubutabera bahabwa kugira ngo zibagereho zinoze kandi biboroheye.”

Elia BYUKUSENGE
UMUSEKE.RW/Nyagatare

Mu Kiganiro n’Abanyamakuru cyabaye kuri uyu wa Gatatu  talki ya 24 Mata  2019, Umuyobozi w’Ibitaro HVP Gatagara Frere Kizito Misago yabwiye Abanyamakuru ko bafite abaganga bake, kandi bafite umubare munini w’abafite ubumuga bakeneye guhabwa ubuvuzi.

Muri iki kiganiro  Abanyamakuru babanje gutambagizwa  mu nyubako y’ibitaro berekwa aho bakorera inyunganirangingo n’isimburangingo, basanga  hari ikibazo cy’uko ibikoresho zikozemo bihenze bigasaba ko zitumizwa hanze y’igihugu.

Umuyobozi w’Ibitaro bya HVP Gatagara Frere  Kizito  Misago  avuga ko ikibazo kibahangayikishije cyane ari umubare muke w’abakozi ugereranije n’abarwayi bagomba kwitaho.

Kizito avuga ko   iki kibazo  cyakomeye  aho Leta yemereye  zimwe muri serivisi zitangirwa muri ibi bitaro  kwakira abivuriza ku bwisungane mu kwivuza bituma umubare bakira ku munsi wiyongera.

Yagize ati‹‹Twakoze imbonerahamwe  igaragaza  umubare w’abakozi dukeneye muri uyu mwaka dutegereje  ko Minisiteri y’Ubuzima iyemeza  kugira ngo badufashe gutanga serivisi ku barwayi››

Mayor Ntazinda Erasme  Umuyobozi w’Akarere ka Nyanza wari  muri iki Kganiro avuga ko  batangiye gukora jubuvugizi mu nzego zitandukanye zirimo Minisiteri y’Abakozi n’Umurimo na MINISANTE kugira ngo harebwe uburyo ikibazo cy’umubare muke w’abakozi  uri kuvugwa muri ibyo bitaro.

Ati:‹‹Muri iyi ngengo y’Imali iri hafi kurangira hari abakozi bari babemereye ndetse hari abageze no mu kazi, turizera mu ngengo y’Imali y’umwaka utaha abakozi bazaba batangiye gushyirwa mu myanya y’imirimo››

Abanyamakuru kandi babajije ku kibazo cy’umuhanda w’ibitaka ugana kuri ibyo bitaro  urimo ibinogo igihe uzatunganyirizwa, Ntazinda avuga ko  hari undi muhanda babanje gukora  wari warangiritse cyane, gusa akavuga ko  mu ngengo y’Imali y’umwaka utaha uwo nawo uzatangira gukorwa.

Ubusanzwe muri ibi bitaro bya HVP Gatagara  harimo abakozi 104 muri rusange , barimo abaganga 4 gusa ku bakozi 154 bari bakenewe by’umwihariko mu bitaro kugira ngo ababagana babashe guhabwa serivisi  zihuse.

MUHIZI ELISEE
UM– USEKE.RW/Nyanza.