Ibirindiro bya gisirikare bya Amerika mu Burasirazuba bwo Hagati byibasiwe bikomeye n’ibitero byo kwihorera bya Iran mu majoro abiri akurikirana.
Ingabo zishinzwe kurinda Impinduramatwara ya Kiyisilamu muri Iran (IRGC) zatangaje ko zagabye ibitero byo kwihorera ku birindiro bya Amerika biri mu kigobe.
Abanyamerika bari muri Yorodaniya basabwe kwihisha ahatekanye, mu gihe igisirikare cya Koweti cyatangaje ko kiri guhangana n’ibitero byagabwe, ndetse no muri Bahrain.
Igisirikare cya Amerika cyatangaje ko ibitero cyagabye kuri sisitemu zigenzura itumanaho n’ibirindiro by’ubwirinzi bwo mu kirere bya Iran byageze ku ntego.
Perezida wa Amerika Donald Trump yatanze umuburo ko ibitero bishobora kongera gusubukurwa mu gihe hataba habonetse amasezerano.
Yavuze ko abayobozi bakuru ba Iran bamusabye guhagarika igitero giheruka, nk’uko Fox News yabitangaje.
Mu kwihorera, Iran yavuze ko yateye ibirindiro bya gisirikare bya Amerika biri muri Bahreïn na Koweït, ari na byo yari yerekejeho ibitero ku munsi wa mbere.
Uru ruhererekane rw’ibitero bikozwe hifashishijwe ibisasu biremereye muri iyi minsi rukomeje gushyira mu kaga abaturage no kurenga ku masezerano impande zombi zumvikanyeho muri Mata 2026.
Nyuma y’igitero giheruka cya Amerika, humvikanye urusaku rw’iturika rikomeye mu mijyi yo mu majyepfo ya Iran hafi y’umuhora wa Hormuz.
Ishami rya Gisirikare rishinzwe kurinda ubutegetsi bwa Kiyisilamu (IRGC) ryavuze ko ryarashe amato abiri manini atwara peteroli yanyuraga mu muhora wa Hormuz.
Ibi byatangajwe n’ibinyamakuru bya Leta ya Iran, nubwo nta yandi masoko yigenga yari yabyemeza cyangwa ngo abihakane.
Ibyo byabaye nyuma y’uko ibinyamakuru bya Leta ya Iran bitangaje ko umuhora wa Hormuz wafunzwe burundu ku mato yose. Gusa CENTCOM yemeje ko amato y’ubucuruzi akomeje kuwunyuramo, yaba ayinjira cyangwa ayisohokamo.
NDEKEZI JOHNSON / UMUSEKE.RW
